Ebur Rayhan Biruni - ابو الريحان بيرونی

(محمد بن احمد خوارزمی) مشاهیرحكمای سلامدن اولوب، معارف و مدنیت اسلامیه نك ترقیسنه اك زیاده خدمت ایدنلردندر. آل سبكتكینه منسوب اولمغله، بو خاندانك هندستانده اولان فتوحاتندن بالاستفاده، قرق سنه اقطار هندیه ده سیر و سیاحت، و لسان هندی یی تحصیل و تعلم ایده رك، هندلیلری معارف اسلامیه دن بهره مند ایتدیكی كبی، هند حكماسنك ماحصل علم و افكارلرینی دخی معارف اسلامیه یه ضم و علاوه ایتمشدر. الحاصل یونان و هند حكماسنك افكار وفنوننه واقف اولمغله برابر، بین الاسلام متداول اولان فنونك كافه سنده، و علی الخصوص علوم ریاضیه و طبیعیه ایله هیىٔت و نجوم و جغرافیا و طب فنلرنده نادرۀ روزكار ایدی. هله جغرافیا فننه بیوك خدمتلر ایدوب، غایت طوغری و مفصل معلومات ویرمكله برابر، زماننه دكین مجهول قالمش اولان هندستان وساىٔر اقطار شرقیه حقنده دخی برنجی اوله رق معلومات مكمله ویرمشدر. تاریخ طبیعی یه دخی خدمتی بوندن دون اولمیوب، ذی قیمت طاشلر و علی العموم احجار و معادن و نباتات و خیوانات حقنده تحقیقات مكمله اجرا. و معلومات مفصله اعطا ایتمشدر. حكیم مشهور ابن سینا ایله معاصر اولمغله، بینلرنده مساىٔل فنیه و مباحث علمیه یه متعلق بر چوق مخابرات وقوع بولمش، و بونلرك بعضیسی برر كتاب تشكیل ایتمشدر. وفاتی اصح روایاته كوره ٤٣۰ تاریخنده

واقع اولوب، ٤٤۰ ویا ٤٥۰ تاریخنه دك بر حیات بولندیغی دخی مرویدر. آثارینك باشلیجه لری بروجه آتیدر : هیىٔت و نجومه متعلق ((قانون)) كه مسعود بن محمود سبكتكینك نامنه یازمشدر، تاریخ و نجومه متعلق ((الآثار الباقیة عن القرون الخالیة)) كه شمس المعالی قابوسك نامنه یازمشدر، ((الارشاد فی احكام النجوم))، ((الاستشهاد باختلاف الارصاد))، ((الاستیعاب فی تسطیح الكرة))، ((تخرید الشعاعات والانوار))، ((التفهیم لاولی صناعة التجیم))، ((التنبیه علی صناعة التمویه))، ((كتاب الجماهر فی الجواهر))، ((كتاب فی الاسطرلاب))، ((كتاب الشموس الشافیة للنفوس))، ((العجاىٔب الطبیعیة و الغراىٔب الصناعیة))، ((كتاب الاحجار))، ((الزیج المسعودی))، ((اختصار المجسطی))، مقالید الهیىٔة))، حروف هجا ترتیبیله ((كتاب الصیدلة))، ((مقالة فی تلافی عوارض الزلة فی كتاب دلاىٔل القبلة))، ((مقالة فی استعمال الاسطرلاب لاب الكری))، ((كتاب الاظلال))، ((شرح دیوان ابی تمام))، ((مختار الاشعار والآثار))، ((التعلیل باحالة الوهم فی معانی النظم))، بو صوك اوچ اثرندن ادبیاتله دخی توغل ایتمش اولدیغی آكلاشیلیور. بیرونینك آثاری آوروپاجه دخی مقبول و معتبر اولوب، اكثر كتبخانه لرده نسخه لری موجوددر. كوپریلی كتبخانه سنده ((احوال الهند)) عنوانیله بر تألیفی ده موجوددر.