Ebu Bekir Beyhaki - ابو بكر بيهقی

(احمد بن‌ حسین) مشاهیر محدثیندن و فقهاء شافعیه دن اولوب، زماننك اعلم علماسی ایدی. استماع احادیث شریفه مقصدیله خیلی وقت سیروسیاحت ایتمش، و بیك جزىٔه قریب تألیفات یازمشدر. امام شافعینك نصوصنی برنجی اوله رق ١۰ جلد اوزره ((المبسوط)) عنوانیله جمع ایتمشدر. مؤلفات ساىٔره سنك باشلیجه لری شونلردر : ((السنن الكبیر)) ، ((السنن الصغیر))، ((دلاىٔل لنبوة))، ((السنن و الآثار))، ((شعب الایمان))، ((مناقب الشافعی المطلبی))، ((مناقب احمد بن حنبل))، ((كتاب الخلاف))، ((كتاب الاسماء و الصفات))، ((كتاب البعث و النشور))، ((كتاب المدخل))، ((كتاب الاعتقاد))، ((كتاب الزهد))، ((كتاب الترغیب))،‌ اصحاب زهد و قناعتدن ایدی. تدریس ایچون نیسابوره ایستنیله رك، كیتمش؛ و وفاتنه قدر اوراده افاده ایله مشغول اولوب، ٤٥٨ تاریخنده ارتحال ایتمشدر. ٣٨٤ تاریخنده نیسابور مضافاتندن (بیهق) قریه سنده طوغمشیدی. و جنازه سی اورایه نقل و دفن اولنمشدر.