İbni Esir - ابن ایثر

(ابو الحسن عزالدین علی بن ابی الكلام) آنف الترجمه مجدالدینك برادری اولوب، علم و فضلیله و تاریخه متعلق اولان آثار مقبوله سیله شهرتیاب اولان مورخ مشهوردر. ٥٥٥ تاریخنده جزیرۀ ابن عمرده تولد و اوراده نشأت ایدوب، بعده پدریله و ایكی برادریله موصله كیده رك، اوراده توطن ایتمش؛ و كاه صاحب موصل‌طرفندن مأموریت و رسالتله، كاه لاجل السیاحه، دفعاتله بغداده وشام و قدسه كیدوب، مشاهیر علمای عصردن اخذ و قراىٔت ایتدكدن صكره، موصله عودتنده، خانه سنده قپانوب، عمرینی مطلعه و تألیفه، و كندیسنی زیارته كیدنلرله مباحثه یه حصر ایتمشیدی. حفظ حدیثده و علم تاریخ و انساب عربده زماننك امامی ایدی. علم تاریخده ((كامل)) عنوانیله غایت معتبر و مشهور بر كتاب یازمشدر، كه ١٢ بیوك جلددن عبارت اولوب، خلفت عالمدن باشلایه رق، ٦٢٨ سنه سی ختامنه دك كافۀ احوال و وقوعاتی غایت سلیس و كوزل بر عباره ایله نقل و روایت ایدیور. بو اثر فلمنكك (لیدن) شهرنده غایت مصحح اوله رق ١٨٦٦ تاریخ میلادیسىٔده طبع ایدلمش اولدیغی كبی، اخیراً مصرده دخی نشر اولنمشدر. صحابۀ رسول الله (صلعم) اسامی و تراجم احوالنی جامع اولمق اوزره ((اسدالغابه فی معرفه الصحابه)) عنوانیله ٥ جلددن مركب دیكر بر اثر جلیلی دخی واردر، كه فاىٔده و اهمیتجه تاریخندن كری قالمیوب، بوده ١٢٨۰ تاریخنده مصرك ((و هیبه)) مطبعه سنده طبع اولنمشدر. سمعانینك مشهور ((كتاب الانساب)) نی دخی اختصار وبر چوق یرلرینی تصیحح ایده رك، ٣ جلد اوزره غایت قیمتدار بر اوچنجی اثر متدانه قویمشدر. ٣۰٦ تاریخنده موصلده وفات ایتمشدر. بو اوچنجی تألیفنك هنوز طبع اولنمامسی، و اوچنك ده لسانمزده ترجمه لری بولنمامسی شایان اسفدر.

قاىٔل اولان ادویه نك قوت و خصایصی حقنده اولان معلومات مكمله سی اولوب، زماننده اعیان و اكابر مسلمیندن بر چوق ذوات مسموماً وفات ایتمشلردر. معاویه طرفندن اوغلی یزیدك ولی عهدلكی تكلیف اولندقده، اصحاب نفوذدن بر چوق ذوات مخالفت ایدوب، عبدالرحمن بن خالد بن ولیدی ترجیح ایتدكلرندن، درعقب عبدالرحمن خالد صاحب ترجمه ن ترتیب ایتدیكی بر شربتله مسموماً وفات ایتمش؛ و مكه ده بولنان برادر زاده سی (خالد بن مهاجر بن خالد بن ولید) بونی ایشیتدیكنده، هر نه قدر كه عمیجه سی مرقوم عبدالرحمن معاویه نك و كندی پدری مهاجر ایسه حضرت علبنك طرفنی التزام ایتمش اولدقلرندن، عمیجه سنه اوقدر محبتی یو غیدیسه ده، قرابت غیرتیله شامه كیدوب، ابن اثالی قتل ایتمشدر. مورخ واقدینك روایتنه كوره، حضرت علی طرفندن مصر والیلكنه نصب اولنوب، عریشده وفات ایدن (اشتر) ە و حضرت امام حسنه ایچیریلن زهرلر دخی صاحب ترجمه نك جملۀ تر تیبات ملعنتكارانه سندن ایدی.