Amstredam - آمستردام

فلمنك دولتنك پایتختی و (نورد هولانده) یعنی ((شمالی فلمنك)) ایالتنك مركزی اولان بیوك بر شهردر، كه دنیانك بیوك تجارتكاهلرندن اولوب، (زویدرزه) كورفزینك جنوب غربیسنده بولنان (ای) خلیجنك جنوبی ساحلنده، ً٣۰ َ٢٢ ْ٥٢ عرض شمالی ایله ً٥٤ َ٣٤ ْ٢ طول شرقیده واقعدر. ٦٨٦ ٣٧٨ اهالیسی اولوب، بونلرك ایچنده ۰۰۰ ٣۰ دن زیاده سی یهودیدر. شهر ساحل بحرده بر نصف داىٔره صورتنده اولوب، (آمستل) نهری جنوب جهتندن دخول ایله، شهرك ایچندن چكه رك، مذكور خلیجه

دوكیلور. بو نهر ایله دكیز آره سنده بر چوق جدوللر آچلمش اولدیغندن، شهر بینلرنده ٣۰۰ كوپری ایله اختلاط ایدر. ٩۰ دن زیاده آطه یه منقسمدر. سوقاقلرك اكثریسی بوجدوللرك كنارلرنده اولوب، غایت كوزل دوشنمش و پك منتظم وكنیشدر. اولری قازیقلر اوزرینه مبنی اولوب، طوغله دن واقطار شمالیه یه مخصوص بر طرزده اولمغله، چاتیلری دیك ویوكسكدر، و اكثریسنك اوكنده مرمردن آچیق مردیونلری واردر. قره جهتنده شهرك اطرافنده بر سور وبرحندق وار ایسه ده، سورك اوستی آغاجلرله تزیین اولنه رق، مسیره اتخاذ اولنمش، وبرجلری اوزرنده یل دكرمنلری یاپلمشدر. آمستردامك پك مشهور ابنیه سی، عدلیه داىٔره سی، بورسه داىٔره سی و ایكی كلیساسیدر، (ای) خلیجنده ریختملرك قارشیسنده یاپلمش اولان ایكی سد، ترسانه فابریقه لری، نباتات و حیوانات باغچه لرینی دخی حاوی اولان بیوك بر دوحه سی، موزه خانه ایله اونك یاننده كی رسام مكتبی، دیكر بر قاچ نمونه خانه سی، اوچ تیاتروسی وساىٔر مؤسسات عمومیه سی شایان تماشا آثار‌ صنعیه دندر. علوم، فنون، صنایع واعانه و خیرات جمعیتلری پك چوقدر. آنجمن معارفی میلادك ١٨۰٨ و صنایع نفیسه انجمن دخی ١٨١٧ ده تأسیس اولنمشدر. تربیۀ عمومیه نك ترقیسیله احوال فقرانك اصلاحی وظیفه سیله موظف اولان بر جمعیت دخی ١٧٨٤ تاریخندن بری موجوددر. شهر ٣٦ اعضادن مركب برمجلس بلدی ایله ١٢ بلد یه مدیری طرفندن اداره وعساكر ملیه طرفندن محافظه اولنور. بلد یه قومیسرلریله پولیسلری دخی پك منتظمدر. هر نه قدر كه شهرك اصل مشغولیتی تجارت اولوب، صنایعی اودرجه ده چوق دكل ایسه ده، كتن وایپك منسوجات متنوعه سیله قطیفه، باصمه، پورسلین، شكر، توتون و مواد كیمیویه ایله انواع ماكینه لر فابریقه لری و دمیرخانه لری دخی چوقدر. الماس وساىٔر ذی قیمت طاشلرك یونتلمسی صنعتی ایسه بو شهره مخصوص دنیله جك درجه ده ترقی و توسع ایتمشدر. آمستردام بتون آوروپانك بر بیوك مخزنی حكمنده اولوب، پك بیوك بر تجارتی واردر. متعدد دمیریوللرله وقناللرله فلمنكك هر طرفیله مربوط اولوب، (زویدرزه) كور-

فزندن بشقه، بری شماله طوغری (هلده) بروننه ودیكری غربه طوغری بحر شمالی یه منتهی اولان ایكی قنالی واردر، كه تجارت بحریه سنی فوق العاده تسهیل ایدرلر. لیماننه سنوی ٢٥۰۰ دن زیاده سفاىٔن كیرر. بهر سنه ایلول آینده كشاد اولنوب اوچ هفته دوام ایدن بازارنده كلیتلی تجارت اجرا اولنور. آمستردام یكی بر شهر اولوب، اون ایكنجی عصر میلادیده بر دره بكی قلعه سندن عبارت ایدی. اون بشنجی عصرده شهر حالنه كیروب، سورله احاطه اولنمش، و او وقتدن بری بیومكده دوام ایدوب، عصر حاضرك ابتداسنده پایتخت اتخاذ اولنمشدر. آنجق پایتختلغی دخی فخری بر عنواندن عبارت اولوب، اصل قرالك اقامتكاهی وحكومت مركزیه نك مقریله مجلس مبعوثانك محل اجتماعی (های) شهریدر.