Amir biahkamillah ~ آمر باحكام الله
Kamus-ul'Alam - Amir biahkamillah ~ آمر باحكام الله maddesi. Sayfa: 366 - Sira: 5
Amir biahkamillah - آمر باحكام الله
(ابو علی منصور) مصرده حكومت سورن فاطمیوندن اولوب، ٤٩٥ تاریخ هجریسنده پدری مستعلی احمدك وفاتی اوزرینه بش یاشنده اولدیغی حالده، تخته جلوس ایدوب، ادارۀ امور دولت پدرینك وزیری
افضل شاهنشاه ابن امیر الجیوشك یدینه تسلیم اولنمش ایدی. آمر سن رشده وصولنده مذكور افضلی قتل ایله، مأمون ابو عبدالله بن ابی شجاعی وزراتنه تعیین ایتمش ایسه ده، بو ذات بسبتون امور اداره یی الینه آلوب، بعض حركات نامرضیه ده بولندیغندن، ٥١٩ سنه سی رمضاننك دردنده اموالی مصادره اولنه رق، كندیسی بش قرداشیله برابر شهرك خارجنده صلب اولنمشدر. بونك زماننده فرنك اهل صلیبی عكا وطرابلس شامی ضبط ایتمشلردی. قدس حكمداری (بردویل) دخی مصره تجاوزله، (فرما) شهرینی ضبط و احراق ایتمش ایسه ده، اوراده خسته لنوب، عودتنده یولده وفات ایتمشدر. مهدی محمد بن تومرت دخی بونك زماننده مصردن خروجله مغربه كیتمشدر. آمرباحكام الله فطین وعاقل وعالم بر آدم اولوب، طبیعت شعریه سی وحسن خطی دخت وار ایدیسه ده، اسمنك مدلولنه مغایر اوله رق، ظالم وبدخوی اولدیغندن، تبعه سی كندیسندن خشنود اولمیوب، نهایت ٥٢٤ تاریخنده باغچه سنه كیتمك اوزره بر كوپریدن چكركن، اوراده پوصی طوتمش بر قاچ آدم طرفندن یاره لنوب، بر قاچ ساعت صكره متأثراً وفات ایتمشدر. شو قطعه جملهۀ اشعارندندر : اصجت لا ارجو ولا اتقی الا الهی وله الفضل جدی نبی و امامی ابی ومذهبی التوحید و العدل
Kamusul Alam, Şemseddin Sami; Kamusul Alamde Amir biahkamillah maddesi. osmanlıcada Amir biahkamillah ne demek, Amir biahkamillah anlamı manası, Amir biahkamillah osmanlıca nasıl yazılır. Osmanlıca sözlükte Amir biahkamillah hakkında bilgi. Arapça Amir biahkamillah ne demek. Arapça osmanlıca sözlük. Farsçada Amir biahkamillah anlamı
Kamusul Alamde - آمر باحكام الله Amir biahkamillah maddesi. Şemseddin Sami, Kamusul Alam Ansiklopedisi