Almeria - آلمريه

اسپانیانك جنوب شرقیسنده بر ایالتدر، كه اندلس قطعه سنك قسم شرقیسندن عبارت اولوب، مركزینك اسمیله تسمیه اولنمشدر. آق دكیز ساحلیله (سیرا نواده)

سلسلۀ جبالنك آره سنده واقع طاغلق بر محل اولوب، غرب شمالی طرفندن غرناطه، و شرق شمالی طرفندن مرسیه ایالتلریله، و شرق و جنوب طرفلرندن دخی آق دكیزله محدود ومحاطدر. مساحۀ سطحیه سی ٨٧۰٣ مربع كیلومتره، و اهالیسی ٤٣۰ ٣٥٧ كشیدر، كه بهر مربع كیلومتره باشنه ٤۰ كشی دوشر. ایالت ١۰٣ ناحیه دن مركب اولوب، ٩ قضایه منقسمدر، كه شونلردر : المریه، برجه، قنجایار، جرغال، هوىٔرقال، اوورا، پورشنا (یاخود برشان)، سورپاس، ولزروبیو، ورا. هواسی عمومیت اوزره معتدل اولوب، سواحلنده حرارت، طاغلرك اوستنده برودت غالبدر. سیرا نواده نك ذروه لری اكثریا قارله مستوردر. بو سلسله دن سواحله طوغری اوزانان فرعلر و اتكلرك كثرتی مناسبتیله اكثر اراضیسی طاغلق ایسه ده، طوپراغی غایت منبت اولوب، سلسلۀ مذكوره دن اینن بر چوق نهرلرله اسقا اولنور. مذكور طاغلرك اك بیوكلری (آدره) نهریله (المریه) نهری آره سنده اوزانان (غادور) و المریه نهریله المنصوره نهری آره سنده ممتد اولان (لوس فیلابرس)، و المنصوره نهرینك شمالنده اولان (استانچاس) و (ماریه) طاغلریدر، كه صكره كیلردن برینك ارتفاعی ١٣٩۰ ، و دیكرینك ارتفاعی دخی ١٥٨٩ متره در. مذكور اوچ نهرك و اونلره دوكیلن كوچك چایلرك كنارلری غایت كوزل اووه لر اولوب، میوه دار آغاجلر و كوزل شراب ویرر باغلرله مستوردر. دود آغاجلری دخی چوق اولوب، اهالی ایپك بوجكی یتیشدیررلر. محصولاتی حبوبات متنوعه ایله، زیتون یاغی، ایپك، شراب وساىٔره دن عبارت اولوب، طاغلرنده كی قورشون، باقیر و كومش معدنلریله مرمر ویشیم اوجاقلری دخی ثروت محلیه نك باشلیجه منبعلرندندر.