Alembert - آلمبرت

یاخود دالمبرت فرانسه نك (آنسیقلوپدیست) یعنی ((اصحاب مجموعۀ فنون)) تعبیر اولنان حكماسندن اولوب، میلادك ١٧١٧ تاریخنده پارسده طوغمش؛ و والده سی طرفندن سوقاغه آتیلوب، پولیس طرفندن آلنه رق، (روسو) اسمنده فقیر بر جامجینك قاریسنه تسلیم اولنمشیدی. بیودكدن صكره پدر و والده سی كیملر اولدیغنی آكلامش ایسه ده، والده سی كندیسنی كسب شهرت واعتبار ایدنجه یه قدر طانیمق ایستمدیكی حالده، جامجینك قاریسی كندیسنی اولاد كبی بیوتمش اولدیغندن، بو قادینه داىٔما و الده سی نطریله باقمشدر. (سنت ژان لروند) كلیساسی قپوسنده بولندیغندن، اسمنی دخی (ژان لروند) قومشلردی : مؤخراً (آلمبرت) ویا ( دالمبرت) اسمنی اخذ ایتمشدر. تا چوجقلغندن علوم ریاضیه یه فوق العاده میل واستعدادی اولمغله ٢٢ یاشنده ایكن، علوم مذكوره یه داىٔر نشر ایتدیكی بعض مطالعاتله كسب شهرت ایده رك، ١٧٤١ ده فنون آقادمیاسی اعضالغنه تعیین اولنمشیدی. متعاقباً جر اثقاله متعلق بعض اثرلر نشر ایتمكله، زماننك

برنجی ریاضیونی صره سنه چكمش؛ و ١٧٤٦ ده برلین آقادمیاسنك روزكارلرك سبب عمومیسی كشفنه مقابل وعد ایتمش اولدیغی مكافاته ناىٔل اولوب، اولبابده تنظیم ایتمش اولدیغی لایحه برلین آقادمیاسی هیىٔتنك او قدر تحسین وتقدیرینه مظهر اولمش، كه كندیسنی كمال تفخرله آقادمیالرینك اعضالغنه قبول ایتمشلردر. ١٧٥۰ تاریخنده حكیم (دیدرو) ایله بالاشتراك مشهور (آنسیقلوپدی) یعنی (( مجموعۀ فنون)) ك نشرینه باشلامش، وبو مجموعه یه علوم ریاضیه نك اك عالی مساىٔلنه داىٔر بندلر ویردكدن ماعدا بعض ادبی بندلر دخی ویرمش، ومجموعه نك مقدمه سنی تنظیم ایتمشدر، كه بو آثار ادبیه سی دخی بین الادبا شهرتنی، و مؤخراً فرانسه نك عمومی آقادمیاسی اعضالغنه تعییننی موجب اولمش؛ و ١٧٧٢ ده آقادمیانك داىٔمی كاتبی عنواننی آلمشدر. ١٧٨٣ ده، ٦٧ یاشنده اولدیغی حالده، مثانه سنده طاش حصولندن وفات ایتمشدر. علوم وقنونده یدطولاسی اولمغله برابر، بر حكیمه یاقیشیر اخلاقله دخی متخلق، خیرخواه وقناعتكار بر ذات اولوب، فرانسه طرفندن ساىٔر حكما ایله برابر تضییق وتعقیب اولندیغی حالده، پروسیه قرالی بیوك فردریقك كندیسنی برلین آقادمیاسی ریاستنه تعیین ایتمك اوزره واقع اولان دعوتنی قبول ایتمه مش؛ و روسیه ایمپراطوریچه سی ایكنجی قترینه نك اوغلی مربیلكنه نصب ایتمك اوزره اولان تكلیفنی رد ایتمشیدی. وولتر حقنده فوق العاده محبت و حسن ظنی اولوب، بینلرنده تعاطی ایتمش اولدقلری مكتوبلر بر بیوك كتاب صورتنده نشر اولنمشدر. خرستیانلغك علیهنده وولترله همفكر وهمسلك ایدی. آثار فنیه وادبیه سی پك مقبول اولوب، بر كره ١٨ ومؤخراً ٥ بیوك جلد اوزرینه نشر اولنمشدر. مشهور (قوندروسه) دالمبرتك مدحیه سنی یازمشدر.