Adour ~ آدور
Kamus-ul'Alam - Adour ~ آدور maddesi. Sayfa: 62 - Sira: 10
Adour - آدور
فرانسه نك جنوب غربی جهتنده كاىٔن (غاسقونیه) ایالتنك بر نهریدر، كه باشلیجه شعبه سی (پیرنه) سلسله سنك (تورماله) طاغندن نبعان، وقیالر آره سندن بر چوق شلاله لر تشكیل ایده رك جریان، و (سنت ماری) شهری قربنده مؤخراً آچلمش اولان بر تونل واسطه سیله (پیرنه) طاغلرینك اك بیوك كوللرندن اولان ((ماىْی كول)) كوزل جنسلی آتلر یتیشدیریلن بر طاقم چایرلر اروا ایدر. ((یوكسك پیرنه)) سنجاغندن چیقدقدن صكره، (ژرس) سنجاغنده (آروس) و (لز) چایلرینك صولرینی دخی صول ساحلندن (غابا)، (لوت) ، (لونی) و (غاو) نهرلرینك وصاغ ساحلندن دخی (میدوز) نهرینك صولرینی طوپلار. بو نهرلردن یالكز (غاو) نهری (آدور) ە خیلی كلیتلی صو دوكر، علی الخصوص پیرنه طاغلرینك قارلری اریدیكی وقت، بونهرك صویی (آدور) ك صویندن دخی زیاده اولور، چونكه آدور مجراسنك اطرافنی اروا ایله صوینك بر قسمنی غاىٔب ایدر. آدور (اوست پیرنه) سنجاغنده (تارب) شهرینك جوارندن چكدیكی كبی، (لاند) سنجاغنده دخی (ار)، (غرناده)، (سن سور) و (داقس)
شهرلرینك یانندن چكدكدن صكره، (غاو) نهریله تلاقی ایتدیكی محلده (آلت پیرنه) سنجاغنك حدودینه و اصل اولور، واوردن منصبنه قدر ٣۰ كیلومتره لك مسافه ده (لاند) سنجاغیله (آلت پیرنه) سنجاغنك حدودینی تشكیل ایدر. مجراسنك بو صوك قسمنده دخی صولدن (بیدونه) ، (لاران)، (آردانابیا) و (نیوه) چایلرینك صولرینی آلیر. آدوره دوكیلن بو نهرلردن (میدوز) ك ٤٣، (غاو) ك ١۰، (بیدوز) ك ٢۰ ، (لاران) ك ١٥ ، (آردانابیا) نك ١۰ و ا(نیوه) نك ٢٨ كیلومتره لك مجرالری سیر سفاىٔنه صالح اولوب، بعضیسنده منتظم صورتده واپورلر ایشلیور. (آدور) ك كندیسی ایسه منصبندن ١٢٨ كیلومتره یوقاری (لاند) سنجاغنده كی (سن سور) قصبه سنه قدر، سیر سفاىٔنه صالح اولوب، منصبنه قریب اولان (بیونه) شهرینه پیرنه و (لاند) دن اودون، كراسته، قطران وساىٔره ایندیرر. مجراسی ٣٣۰ كیلومتره اولوب، (بیونه) شهرینك بش بچق كیلومتره آلتنده (بوقو) قریه سی جوارنده بحر محیط اطلاسینك (غاسقونیه) كورفزینه دوكیلور. بو نهر خیلی قوملر دوكدیكندن. منصبنده حاصل اولان قوم سدلرندن طولایی، اعصار سالفه ده بر قاچ دفعه یول ومنصبنی دكیشدیرمش؛ وعصر حاضرده فرانسه حكومتی متین سدلر چكه رك، بوفنالغك اوكنی آلمش ایسه ده، دوكیلن قوملر آغزینی جذر حالنده كمیلرك سربست دخولنه مانع اوله جق بر حاله قومقده اولوب، بونك چاره سی بولنه مامشیدی. بو حال مانع اولمیه ایدی، (بیونه) شهری فرانسه نك سواحل غربیه سنك اك بیوك اسكله لری صره سنه چكه بیله جكدر. بو نهرك اسمی اسكی (غال) لساننده ((صو)) دیمك اولان (دور) كلمه سندن مشتق اولوب، اسكی یونان ولاتین جغرافیونی طرفندن (آتوروس) تسمیه اولنمشدر.
Kamusul Alam, Şemseddin Sami; Kamusul Alamde Adour maddesi. osmanlıcada Adour ne demek, Adour anlamı manası, Adour osmanlıca nasıl yazılır. Osmanlıca sözlükte Adour hakkında bilgi. Arapça Adour ne demek. Arapça osmanlıca sözlük. Farsçada Adour anlamı
Kamusul Alamde - آدور Adour maddesi. Şemseddin Sami, Kamusul Alam Ansiklopedisi