Assyrie - آثوریه

یاخود آثوریا آسیانك تقسیمات قد یمه سندن بر مملكت ایدی، كه دجله مجراسنك اوست جهتنده نهرك ایكی طرفنده واقع اولوب، جزیره نك شمال شرقی قسمیله بو كونكی كردستان طاغلرینی حاوی ایدی. غرباً سوریه. جنوباً بابلستان، شرقاً میدیه (یعنی عراق عجمی وآذربیجان) ایله الام (یعنی خوزستان)، شمالاً ارمنستان ایله محاط ومحدود ایدی. مؤخرً آثوریه حكمدارلری

توسیع ممالك ایدوب، بابلستانی دخی ضبط ایله، بابلی پایتخت اتخاذ ایتد كلرندن، بر آرالق (آثوریه) نامنك بابلستانه یعنی عراق عربه دخی شمولی وار ایدی. اك بیوك شهری و مركزی (نینوه) شهری ایدی، كه ایكی بیك سنه یی متجاوز وقتدن بری خراب اولوب، ویرانه لری دخی نابدید اولمش ایكن، یقین وقتده موصل جوارنده كشف، و حفریات اجرا سیله میدانه اخراج اولنمشدر. [(( نینوه)) كلمه سنه مراجعت بیوریله.] بو مملكتك اك اول كوش ابن حام نسلندن فرض اولنان اقوام زنجیه دن بریله مسكون بولنمش اولدیغی مروی ایسه ده، عرض و اقلیمنه نظراً بورو‌ایتك ضختی مشكوك‌‌ اولوب، هر حالده آثوریلردن اول اقوام تورانیه دن برقومك مسكنی بولنمش ؛ و بعده اقوام سامیه دن اولان و كلدانیلرله قرابت جنسیه سی بولنان آثوریلر طرفندن اسكان اولنه رق، او وقت (آثوریه) نامنی آلمش ایدی. بو كو نكی كونده ایسه اوراده آثوریلردن اصلا اثر اولمیوب، آثوریه نامی بیله اونودلمش،‌ و مملكتك هر طرفی ((اقوام آریه)) دن اولان كردلرله مسكون اولوب، كردستان نامنی المشدر. آنجق كرد لرك كرك سیمالری و كرك بوغازدن تلفظلری ساىٔر اقوام آریه یه مشابه‌ اولمدیغندن ، آثوریلرك بسبتون محو اولمیوب، اقوام آریه دن اولان بر قوم حاكمك لساننی قبول ایله، اونلرله قاریشمش، وبو خلطدن كرد قومنك ظهور ایتمش اولمس محتملدر.‌ آثوریلر استقلاللرینی غاىٔب ایدوب، ایرانك ضبطنه چكد كدن صكره دخی، اقوام آریه دن اولان فرس قدیم قومیله خیلی اختلاط ایتمش اولملی ایدیلر، كه مؤخراً یعنی ساسانیلر زماننده ایرانك لسان رسمیسی بولنان پهلو ینك السنۀ سامیه یه منسوب پك چوق كلمه لری جامع بولندیغی كوریلیور. [((كرد)) و ((كرد ستان)) كلمه لر ینه، وآثور یه نك تاریخی ایچون ده ((آثوری)) كلمه سنه مراجعت بیوریله.]