Ardşir babkan - آردشيربابكان

ساسانیان دولتنك مؤسسی اولوب، اسكندرك

زمانندن بری طواىٔف ملوك بیننده منقسم اوله رق بر حال پریشانیده بولنان ایرانك هر طرفنی جمع ایله، یكیدن بر بیوك فرس دولتی تشكیل ایتمشدر، كه میلادك اوچنجی عصری ابتدالرندن انوار اسلامیه نك ایران ممالكنی استیلا ایتدیكی زمانه قدر كمال شو كتله حكمفرما اولمشدر. فردوسینك روایتنه كوره آردشیر بهمن قیزینی ولی عهد براقنجه، اوغلی ساسان عارندن قاچمشیدی. وبو آردشیر اونك نسلندن اولوب، فارس طاغلرنده چوبانلق ایتمكده ایكن، اشكانیان ملو كندن فارس طرفلرینه حكمران اولان (بابك) بونی خبر آلوب، یاننه جلب، وكندینه داماد وولی عهد ایتمش؛ وبابكك وفاتنده آردشیر بونك اسمنه نسبتله بابكان لقبنی آلوب، ارثاً فارس حكمدار اولدقدن صكره، ایرانك ساىٔر طرفلرینی دخی ضبطله دولتنی بیوتمشدر. دیكر بر روایته كوره، كندیسی بابك بن ساسان اسمنده بر آدمك اوغلی اولوب، شجاعت و ذكاوتی حسبیله، ملوك اشكانیاندن فارس حكمداری اولان (اردوان) طرفندن (داراب كرد) شهرینك واوراده كی آتشكده لرك محافظلغنه نصب اولنه رق، بعده اعلان استقلال ایله، اطرافنی ضبط ایتدكدن صكره، كندیسنه مداخله ایتمك ایستیان (اردوان) ایله ایتدیكی محاربه ده بونی میلادك ‌٢٢٦ تاریخنده قتل ایدوب، ملكنی وبعده ساىٔر ممالك ایرانیه یی ضبط ایتمشدر. بعض مورخلر بونك ابتدای حلنده دمیرجی بولنمش اولدیغنی، وفرس قدیم دولتی عندنده مقدس عد اولنان مشهور (درفش كاویان) نام بیراغك بونك اوكلكندن عبارت اولدیغنی بیان ایتمشلر ایسه ده، مشهوری اولان شودر كه مذكور بیراق ضحاكی اولدیرن كاوه نام دمیرجینك اوكلكی ایدی. آنجق ضحاك وكاوه وقوعاتی بر مصالدن عبارت اولوب، وجودنده شبهه اولدیغندن، بو روایتك صحتی دخی محتملدر. اسماً اردوانك تابعیتی آلتنده ١٤ واردوانك قتلندن صكره دخی ١٢ سنه حكومت سوروب، میلادك ٢٣٨ تاریخنده حیاتنده فراغت ایده رك، سلطنتی اوغلی شاپوره براقمشدر.