Ebu Ali Merini - ابو علی مرينی

(عمر بن ابی سعید) مغرب اقصاده حكومت سورن بنی مرین دولتنك اك بیوك حكمداری اولان ابو الحسنك برادری اولوب، ابو الحسندن بیوك اولمغله، پدری ابو سعید طرفندن ولی عهد اتخاذ، وفاس والیلكنه تعیین اولنمشیدی. بعده پدرینه عصیان ایدوب، ممالكنك قسم اعظمنی ضبط ایتدیكندن، ولی عهد لكدن اخراج اولنه رق، برادری ابو الحسن ولی عهد تعیین اولنمش؛ و واقع اولان محارباتده ابو علی مغلوب اولوب، جنوبه طوغری چكلمكه مجبور اولمش، و سجلماسه و سوس جهتلرینی اله كچیرمشیدی. بو نكله قناعت ایتمیه رك، ینه پدرینه قارشی عسكر سوق ایتدیكنده، ینه مغلوب اولمش ایسه ده، پدرینك كندیسنه محبتی اولدیغندن، بو دفعه دخی عفو، و ضبط ایتمش اولدیغی یرلردن بر آزینی كندیسنه ترك ایتمشیدی. ابو سعید وفات ایدوب، ابو الحسن موقع اقتداره كچدیكنده، ایكی برادر آره سنده محاربه تجدد ایدوب، صاحب ترجمه مغلوب اولمغله، اخذ و حبس، و ٧٣٣ تاریخنده محبسده اخناق اولنمشدر.