Ebu İnan Merini - ابو عنان مرينی

(فارس بن ابی الحسن) مغربده حكومت سورن بنی مرین ملوكندن اولوب، پدری مشهور ابو الحسنك قیروانده كی انهزامی و بحراً عودتیله دوننماسنك غرق اولمسی اوزرینه، وفاتی شیوع بولمغله، ابو عنان

مغرب اوسط یعنی جزایر جهتنك والیسی ایكن، فاسه عزیمتله، ٧٤٩ تاریخنده تخت مورثنه اوتورمش؛ و متعاقباً پدری ابو الحسن ظهور ایتمكله، بینلرنده ایكی سنه قدر محاربه وقوع بولوب، صاحب ترجمه پدرینه قارشی سلطنتی محافظه یه مقتدر اولمش؛ و ٧٥٢ ده ابو الحسنك وقوع وفاتیله، ابو عنان رقیبسز قالوب، بو آره لقده الندن چیقمش اولان مغرب اوسط و افریقیه یعنی جزایر و تونس جهتلرینی استردادله اوغراشه رق، بنی زیانله بر چوق محاربه لردن صكره، مظفراً فاسه عودت، و ٧٥٩ تاریخنده وفات ایتمشدر.