Ebu Abdullah Bin Merzuk - ابو عبدالله بن مرزوق

(شمس الدین محمد بن احمد) مغرب علماسندن اولوب، ٧١١ تاریخنده تلمسانده طوغمش؛

و علم و فضلی و خطبه ایرادنده كی فصاحت و مهارتی حسبیله ابو الحسن مرینی و اولادندن ابو عنان و ابو سالم و غرناطه حاكمی ابن احمر عندنده قدر و اعتباری پك عالی بولنمش ایسه ده، مؤخراً اموالی مصادره، و كندیسی حبس اولنه رق، نهایت قورتلدیغندن، تونسه رحلتله، ابو اسحاق حفصی یه التجا ایتمش؛ و ٧٦٤ تاریخنده، بونك وفاتی اوزرینه، اسكندریه و مصره رحلت ایده رك، ملك اشرف طرفندن حسن قبول كورمش؛ و ٧٨١ ده وفات ایتمشدر. ((شرح العمدة))، ((شرح الاحكام الصغری))، ((شرح فروع ابن حاجب)) كبی بعض تألیفاتیله بر چوق اشعاری واردر. خطبه لری دخی جمع و تدوین اولنمشدر.