İbni Seb'ın - ابن سبعين

(قطب الدین محمد بن عبدالحق) اندلس علما و فقها سندن اولوب، ٦١٤ تاریخنده مرسیه ده طوغمش؛ و علوم فلسفیه و تصوفه انتساب ایدوب، فلاسفه و متصوفینك اقوال و افكارینی بریره جمع ایله، كندینه مخصوص بر طریق ایجاد، و بر چوق طلبه و مریدان پیدا ایتدكندن، فساد عقیده ایله شهرت بوله رق، اندلسدن نفی اولنمش؛ و ٦٦٩ ده مكۀ مكرمه ده وفات ایتمشدر. ادبیاتده دخی ید طولی صاحبی اولوب، بلیغ خطبه لری و بعض اشعاری واردر. ((لابد اللعارف))، ((الاحاطة))، ((كتاب فی الجوهر))، ((رسالة العهد)) عنوانلی كتابلری و دیكر بعض رساىٔل یازمشدر.