İbni Esir - ابن اثیر

(ضیاء الدین ابو الفتح نصرالله بن ابی الكرم) آنف الترجمه عزالدین و مجدالدینك برادری اولوب، جزیرۀ ابن عمرده طوغمش؛ و اوراده تحصیل ایتدكدن صكره، پدریله برابر موصله كیدوب، ادبیات و شعر و انشاده كسب تمیز ایتمشدی. ٥٨٧ تاریخنده ملك ناصر صلاح الدین ایوبینك خدمتنه كیرمش؛ و بعده مشارالیهك

اوغلی ملك افضل نورالدینه انتساب ایدوب، هنوز شاب اولدیغی حالده، مشارالیهك وزیری اولمشیدی. دمشق شام ملك افضلك ضبطندن چیقدیغی وقت، كندیسندن دلكیر اولمش اولان بعض اهالی قتلنه قصد ایتمشلرسه ده، حاحب محاسن بن عجم طرفندن بر صندیغك ایچنده مصره قاچیرلمشیدی. بعده ملك افضل مصرده خروج ایتدیكی وقت، صاحب ترجمه، كندیسنه قصدلری اولان بر جماعتك قورقوسندن، برابرنده بولنه میوب، مصردن خفیاً قاچمش؛ و بو بابده بر مفصل رساله یازمشدر. بعده ملك افضل سمیساطده تقرر ایدنجه، یاننه كیتمش؛ و ٦۰٧ تاریخنده كندیسندن آیریلوب، حلب صاحبی اولان برادری ملك ظاهرك یاننه كیتمش ایسه ده، بونكله امتزاج ایده میوب، موصل واربل و سنجاره كیتمش؛ و نهایت ٦١٨ ده موصلده تقرر ایتمش؛ و اورانك صاحبی ناصرالدین محمودك منشیسی اولمشدر. فن انشا حقنده ایكی بیوك جلددن مركب، ((المثل الساىٔر فی ادب الكتاب و الشاعر)) عنوانیله مشهور و غایت مقبول بر تألیفیله ((الوشی المرقوم فی حل المنظوم)) و ((كتاب المعانی المخترعه فی فن الانشاء)) عنوانلریله ایكی اثری واردر. مشاهیر شعرانك اشعار منتخبه سنی جامع بر بیوك مجموعه دخی ترتیب ایتمشدر. بر قاچ جلد اوزره بر دیوان رساىٔلی یعنی محررات منتخبه سی دخی واردر، كه بونك بر جلد اوزره مختصری دخی ترتیب اولنمشدر. ٦٣٧ تاریخنده موصل صاحبی طرفندن رسالتله بغداده كیتدیكنده، اوراده وفات ایتمشدر.