İbrahim İhsai şeyh - ابراهیم احسائی شيخ

(شیخ _) اون برنخی عصر هجری علماسندن اولوب، فقها و نحویوندن معدود واكثر علومده واقف ایدی. بحرینده كی احساء مملكتندن اولوب، وطننك علماسندن قراىٔت ایتدكدن صكره، مكۀ مكرمه یه رحلتله، مكه مفتیسی عبدالرحمن مرشدیدن اجازت آلمش؛ و بعده احسایه عودتنده عارف بالله شیخ تاج الدین هندی یه انتسابله، طریقته داخل اولمش؛ و احساء حاكمی علی پاشازاده امیر یحیی جملۀ مریدانندن اولوب، كندیسنك بعض اقوال حكیمانه و احوال عجیبه سنی نقل ایتمشدر. صاحب ترجمه نك علوم متنوعه یه داىٔر بعض كتابلری واردر. (عمریطی) نك ((نظم الاجرومیه)) سنه بر شرحی و ((دفع الاسی فی اذكار الصبح و المسا)) عنوانلی تصوفه متعلق بر رساله سیله بونك شرحی جملۀ آثارندندر. طبیعت شعریه سی دخی اولوب، شو قطعه جملۀ شعارندندر : ولاتك فی الدنیا مضافاً و كن بها مضافاً الیه ان قدرت علیه فكل مضاف للعو امل عرضة وقد خص بالخفض المضاف الیه ١۰٤٨ سنه سی شوالنك یدنجی كونی احساده ارتحال ایتمشدر.