İbrahim Mevla tacüddin - ابراهیم مولی تاج الدین

(مولی تاج الدین _ ) اوننجی عصر هجری علماسندن اولوب، ٩۰۰ تاریخلرده حمید ایلنده دنیایه كلمش، و تحصیل علم ایچون، وطنندن مفارقتله، زماننك علماسندن اخذ و قراىٔت ایتدكدن صكره، كرك درسعادتده و كرك طشره لرده بر برینی متعاقب بر قاچ مدرسه ده مدرسلك ایتمشدر. علوم عقلیه و نقلیه ده و علی الخصوص علم فقهده ید طولی صاحبی اولمغله، شریفك ((شرح المفتاح)) نه و ((تجرید)) ە حاشیه لر و علم صرفده

((مراح)) بر شرح یازمشدر. شرح مفتاحه یازدیغی حاشیه لرده ابن كمال پاشایه پك چوق اعتراض ایتمش؛ وبو حاشیه نك بر نسخه سنی منسوب بولندیغی صوفی محمد پاشایه، برینی ده وزیر اعظم رستم پاشایه كوندرمش؛ ومشارالیه ایسه علامه ابن كمال‌ پاشادن درس آلمش اولدیغندن، بو تجاوزاته جانی صیقیله رق، فصل دعوایی مفتیٔ زمان ابو السعود افندی یه حواله ایتمش؛ و صاحب ترجمه حقنده خصومت پیدا ایدوب، تفیضنه مانع اولمشیدی. ٩٧٣ تاریخنده ارتحال ایتمشدر.