Amerique - آمريقا

ونام دیكرله یكی دنیا كرۀ ارضك قطعات خمسه سنك بری اولوب، بحر محیط كبیرله برابر كرۀ ارضك نصفنی ضبط ایتمشدر؛ نصف دیكرنده ایسه اسكی دنیا یعنی آوروپا، آسیا، آفریقا و آوسترالیا قطعه لری بولنیور. بو قطعۀ واسعه نك هر طرفی دكیزله محاط اولوب، شرقاً بونی آوروپا و آفریقادن آیران بحر محیط آطلاسی ایله، غرباً آسیا و آوسترالیادن آیران بحر محیط كبیرله، شمالاً دخی بحر محیط شمالی ایله محاطدر. جنوب ووسط جهتلری قطعات ساىٔره دن خیلی اوزاق ایسه ده، شماله طوغری چیقلدقجه، ایكی طرفدن دخی خیلی تقرب اولنه رق، علی الخصوص بهرنك بوغازنده آمریقا ایله آسیا تماس ایتمك درجه سنه قدر قریبدرلر. موقع و وضعیت ومساحه سی. _ آمریقا قطعه سی شمال غربیدن جنوب شرقی یه طوغری ممتد طولانی بر قطعه اولوب، منتهای شمال غربیسنده بهرنك بو-

غازنده كی (پرنس دوغال) برونی ً٣۰ َ٣٣ ً٦٥ عرض شمالی ایله ً٢۰ َ١٩ ْ١٧۰ طول غربیده، منتهای جنوب شرقیسنده كی (هورن) برونی ایسه ً٤۰ َ٥٨ ْ٥٥ عرض جنوبی ایله ً٢٤ َ٣٦ ْ٦٩ طول غربیده واقعدر. بو ایكی برون آره سنده بتون قطعه نك سواحل غربیه سی بوینجه اوزانان سلسلۀ جبال خطی ١٨۰۰۰ كیلومتره طولنده اولوب، آریقانك طول اعظمنی تشكیل ایدیور. بو قطعه بینلرنده بر طار برزخله مربوط ایكی بیوك شبه جزیره دن مركبدر، كه موقعلری اقتضاسنجه، برینه آمریقای شمالی ودیكرینه آمریقای جنوبی دینور. بو ایكی قطعه یی ربط ایدن برزخ خیلی اوزون ایسه ده، بعض یرلری پك كنیش اولوب، اصل برزخ جهت جنوبیه ده‌ یعنی آمریقای جنوبی یه قریب محلنده كی (پنامه) برزخی اولمغله، بونك شمالنده قالان پارچه آمریقای شمالیدن معدوددر، و بعض دفعه آمریقای وسطی اسم مخصوصیله یاد اولنور. پنامه بوغازی یارلمقده اولدیغندن، قریباً آمریقانك ایكی قطعه سی بسبتون بربرندن آیری ایكی قطعه حكمنه كیره جكدر. ایكی قطعه نك محل التصاقی اولان مذكور پنامه برزخی ٤٥ كیلومتره وسعتنده اولوب، تقریباً ْ٩ عرض شمالی و ْ٨٢ طول شرقیده واقعدر. آمریقای شمالینك هیىٔتی غیر منتظم بر صورتده اولوب، شرق طرفندن بحر محیط آطلاسی دكیز دنیلمكه مستحق اوله جق قدر واسع اوچ كورفز تشكیل ایدیور، كه بونلرك ایكیسی یعنی (بافن) و (هوذسون) كورفزلری قطعه نك شمال طرفنده، و (آنتیل) دكیزی دخی جنوبنده واقعدر. همنامی اولان ایرماغنك دوكلدیكی (سنت لوران) كورفزی دخی خیلی واقع اولوب، قطعه نك شرق طرفنده بولنور. غرب طرفندن بحر محیط كبیر یالكز بر كورفز تشكیل ایدیور، كه اوده جنوبدن شماله مكسیقه نك ایچنه درین صوقیلان قالیفورنیا كورفزیدر. بحر محیط شمالیده كی سواحل شمالیه سی ْ٧۰ عرض شمالی خط موهومك اوست و آلتندن اوزانه رق، قارشیسنده بر چوق آطه لر بولنیور. غروىٔنلاند قطعه سی ایسه آیریجه بر قطعه اولوب، جهت شمالیه سی سرمدی قارلر وبوزلرله مستور اولدیغندن، الآن او جهتدن نره یه قدر ممتد اولدیغی كشف او-

لنه مامشدر. بحر محیط آطلاسیده (ترنو) جزیره سیله آمریقای شمالی و آمریقای جنوبی آره سنده و آمریقای وسطینك قارشیسنده بر جسیم اوونك شكلنده اوزانان آنتیل آطه لری و (باهام) جزایری بولندیغی كبی، غرب جهتنده بحر محیط كبیرده دخی ساحله قریب اولان (وانقوور) جزیره سیله قرالیچه شارلوته وپرنس دوغال آطه لری وبهرنك دكیزینك آلتنده آمریقا ایله آسیا آره سنده بر كردانلق دیزیسی صورتنده اوزانان (آلىٔوتی) جزایری بولنیور. آمریقای جنوبی ْ١٢ عرض شمالیدن ْ٥٦ عرض جنوبی یه قدر ممتد اولوب، سواحلی دها دوز ومنتظمدر. شكل عمومیسی بر مثلت صورتنده اولوب، اساسی شمالی شرقی ورأس زاویه سی جنوب جهتنده در. نه سواحل شمالیه سنی ایصلاتان آنتیل دكیزی، نه شرق شمالی و شرق جنوبی اطرافنی احاطه ایدن بحر محیط آطلاسی ونه ده سواحل غربیه سی بیونجه اوزانان بحر محیط كبیر ذكره شایان كورفزلر ویا دكیزلر تشكیل ایتمدكلدی كبی، سواحلك قارشیسنده آطه لر دخی مفقود اولوب، بو جهتلرجه وكرك كرۀ ارضك جنوب قسمنده كی موقعیله بو قطعه آفریقا قطعه سنه مشابهدر. یالكز منتهای جنوبنده ((آتش ارضی)) دنیلن آطه ایله (مالوینه) ونام دیكرله (مالقلاند) آطه لری و (شیلوىٔه) جزایری بولنیور. شوراسی ده اونودلماملیدر، كه آمریقانك منتهای جنوبیسی عد اولنان (هورن) برونی اصل آمریقا قطعه سنه مربوط اولمیوب، ((كشیش اطه سی)) دنیلن بركوچك آطه ده واقعدر. آمریقانك برونلریله ساىٔر اك چیقندیلی محللرینك عرض وطولی بر وجه زیر ذكر اولنور : منتهای شمال غربیسنده اوله رق بهرنك بوغازنده كی پرنس دوغال برونی ً٣۰ َ٣٣ ْ٦٥ عرض شمالی ایله ً٢۰ َ١٩ ْ١٧۰ طول غربیده ؛ بحر محیط شمالیده اولوب آمریقانك اك شمالی نقطه سی عد اولنان (باروو) برونی ً٥٤ َ٤١ ْ١٥٨ طول غربیده ؛ (ترنو) آطه سنك جنوب شرقیسنده اولوب، آمریقای شمالینك اك شرقی نقطه سی اولان (راسه) برونی ً٢٥ َ٣٩ ْ٤٦ عرض شمالی ایله َ٢٢ ْ٥٥ طول غربیده؛

آنیتل‌دكیزنده اولوب، آمریقای جنوبینك اك شمالی نقطه سی اولان (غالیناس) برونی َ٣٤ ْ١٢ عرض شمالی ایله ْ٧٤ طول غربیده؛ آمریقای جنوبینك شمال شرقی كوشه سنی تشكیل ایدوب، بتون آمریقا قطعه سنك اك شرقی نقطه سی اولان (ساىٔوروق) برونی ً١٧ َ١٧ ْ٥ عرض جنوبی ایله ً٢٦ َ٣٧ ْ٣٧ طول غربیده؛ ماجلاند بوغازنده اولوب، آطه لر مستثنا اوله رق، آمریقا قطعه سنك اك جنوبی نقطه سی اولان (فوروارد) برونی ً٤٣ َ٥٣ ْ٥٣ عرض جنوبی ایله ْ٧٣ ً٣٩ َ٣٨ طول غربیده؛ كشیش آطه سنده اولوب، بتون آمریقانك اك جنوبی نقطه سی اولان (هورن) برونی ً٤۰ َ٥٨ ْ٥٥ عرض جنوبی ایله ً٢٤ َ٢٦ ْ٦٩ طول غربیده. آمریقا قطعه سنك مساحۀ سطحیه سنه كلنجه، قطب شمالی داىٔره سی داخلنده بولنان اراضی وجزایر داخل اولمدیغی حالده، وجه آتی اوزره در : آمریقای شمالی ۰۰۰ ٧٥۰ ٢۰ مربع كیلومتره )) جنوبی ۰۰۰ ١٧٨٥ مربع كیلومتره جمعاً ۰۰۰ ٣٨٦۰۰ شكل طبیعیسیله جبالی. _ آمریقا قطعه سی شمالدن جنوبه ودها طوغریسی شمال غربیدن جنوب شرقی یه طوغری بر اوجندن بر اوجنه قدر اوزانان بر سلسلۀ جبال ایله بو سلسله نك غرب طرفندن دیك وقیصه وشرق طرفندن دوز و واسع اووه لرله پك اوزاغه قدر ممتد اولان اتكلرندن عبارتدر. بو سلسلۀ جبال آلىٔوتی جزایری حذاسندن آلاسقه شبه جزیره سندن باشلایه رق، بتون آمریقای شمالی و وسطی وجنوبی شق ایله ماجلاند بوغازینه منتهی اولور. آمریقای شمالیده بوسلسله ایكی متوازی قوله آیریلوب، آره لرنده واسع بر حوضۀ مرتفعه تشكل ایدیور. وكرك داخلی كرك خاریجی یوزلری صرب وطاشلق اولدیغندن ((قیالی طاغلر)) نامیله معروفدرلر. مكسیقه ده بو ایكی قول تفریق اولنه میه جق قدر برلشه رك، بتون مملكتی احاطه ایده جك قدر واسع ومرتفع بر طاغ صورتنی الیور، و (مادره) سلسله سی نامیله یاد اولنیور. آمریقای وسطیده بو سلسله خیلی آلچقلانه رق، بعض یرلرنده الچق بر صرتدن عبارت قالیورسه ده، جابجا

آتش پوسكورمده اولان بركانلری بر بیوك سلسله یه منسوبیتنه شاهددر. آمریقای جنوبیده ایسه تمامیله بر سلسله صورتنی آله رق، بحر محیط كبیر سواحلی بوینجه اوزانیر؛ و (آند) اسم اصلیسیله یاد اولنه رق، غایت مرتفع وجانجا بركانلرله مزین اولان خط اصلینك صاغ وصولنده اتكلری مقامنده اولان بر طاقم طاغلر مردیون كبی بربرندن آلچق اوله رق متوازیاً ممتد اولورلر. (آند) سلسلۀ جبالنه بعض دفعه اسپانیولجه سلسله دیمك اولان (قوردیلره) اسمی دخی ویریلیر. بو بیوك سلسله دن بشقه آمریقاده ایكنجی درجه ده اوله رق اوچ سلسله دها واردر، كه بونلرك بری آمریقای شمالیده، و ایكیسی ده آمریقای جنوبیده در. آمریقای شمالیده كی سلسله ممالك مجتمعه نك جهت شرقیه سنده ممتد اولوب ذكری سبقت ایدن (آلغانی) سلسله سیدر. آمریقای جنوبیده كیلرك بری (اورنوق) ایله (آمازون) ایرماقلرینك حوضه لری آره سنده كی (پارانیم) سلسله سی، و دیكری ده (آمازون) ایله (پارانا) حصه لری آره سنده كی برازیلیا جبالیدر. آمریقا قطعه سنك اك یوكسك محلی آمریقای جنوبینك آند سلسله سنه منسوب اوله رق شیلیده بولنان (آقونقاغوآ) بركانی اولوب، ٦٨٣٤ متره ارتفاعی واردر. خط استوایه قریب اولوب ٦٥٣۰ متره ارتفاعی اولان (شیمپورازو) ذروه سی بر چوق وقت آمریقانك بتون كرۀ ارضك اك یوكسك طاغی ظن اولنمش ایسه ده، مؤخراً مذكور آقونقاغو آنك بوندن یوكسك اولدیغی تبین ایتدیكی كبی، كرۀ ارضك اك یوكسك طاغی دخی آمریقاده اولمیوب، آسیانك (هیمالایه) سلسله سنده بولندیغی تحقق ایتمشدر. شیلی، پرو، بولیویا واقوآدورده ٥٥۰۰ متره دن زیاده مرتفع متعدد ذروه لر واردر. آمریقای شمالینك ایسه اك مرتفع طاغی آلاسقه حدودنده بولنان (سنت ایلیا) طاغی اولوب، ٥٤٤٣ متره ارتفاعی واردر. بو طاغلر آمریقای قطعه سنك بر ربعندن آز یرینی ضبط ایدوب، قصوری كاملاًواسع اووه لردن عبارتدر. بو اووه لرك صورتی اقلیمه كوره مختلف اولوب، اقصای شمالدن ممالك مجتمعه حدودینه قدر طول وعرضی تقریباً ٢٥۰۰ كیلومتره اولان واسع بر اووه چبلاق، صوىٔوق، رطوبتلی وكوللرلر مملودر. بونك جنوبنده اولوب، ینه او وسعتده اولمق اوزره،

مكسیقه كورفزینه قدر ممتد اولان دیكر بر اووه ایسه (میسیسیپی) ایرماغیله اونك تابعلری‌طرفندن اروا اولنور پایانسز برچایر كمنده در، كه ممالك مجتمعه جمهوریتلرینك اهالیسی چوغالدقجه، اعمار اولنه رق، محصولدار حالنه قونمقده در. آمریقای جنوبینك شمال طرفنده دخی (اورنوق) ایرماغنك حوضه سنی تشكیل ایدن و (لانو) یاد اولنان واسع بر اووه كذلك كاملاً چایرلق ایسه ده، حرارتك شدتی حسبیله اوتلری چابق قورور. بونك جنوبنده (آمازون) ایرماغنك حضۀ واسعه سنی تشكیل ایدن پایانسز بر اووه (سلوا) دنیلن بالطه كورمه مش یبانی اورمانلرله مستوردر. بونك جنوبنده (پارانا) ایرماغندن پتاغونیانك منتهای جنوبنه دك دخی (پامپه) دنیلن آغاجسز و بعض یرلری چایرلق بعض یرلری قوملق اولان واسع اووه لر ممتد اولور. ماىٔله لری، نهرلریله كوللری. _ آمریقایی بر یاندن بریانه شق ایدن سلسلۀ جبال بحر محیط كبیرك سواحلی قربنده اوزاندیغندن، بحر محیط آطلاسی یه دوكیلن نهرلری پك قیصه و اهمیتسز اولوب، یالكز آمریقای شمالیده كی قیالی طاغلردن نبعان ایدن (فراسر) و (قولومبیا) ایله (قولورادو) نهرلری بیوجكدر. بحر محیط شمالی یه دخی یالكز (ماكنزیا) ایرماغیله بر قاچ كوچك نهر دوكیلوب، ساىٔر بتون قطعه نك صولری وبیوك نهرلری كاملاً بحر محیط آطلاسی یه دوكیلور. بناءً علیه آمریقا قطعه سی آرقه سنی بحر محیط كبیره ویوزینی بحر محیط آطلاسی یه چویرمش بر قطعه در دنیله بیلیر. آمریقای شمالیده كی (میسیسیپی) ایله آمریقای جنوبیده كی (آمازون) ایرماقلری كرۀ ارضك اك بیوك نهرلرندن اولوب، (سنت لوران) نهری دخی مجراسنك قیصه لغیله برابر دوكدیكی صویك كلیتلی حسبیله انهار عظیمه دن معدوددر. مكسیقه ده كی (ریونورته) ایله (ونزوىٔلا) ده كی (اورنوق) نهرلری، میسیسیپی) و آمازون ایرماقلرینه نسبةً دره دنیله بیله جك قدر كوچك اولدقلری حالده، طونه نهریله مساویدرلر. منصبنده (ریو ده لاپلاته) یعنی ((كومش صویی)) نامنی آلان (پارانا) نهری ایسه طولاً اورنوقك ایكیسی قدردر. آمریقای شمالینك قسم شمالیسنده یعنی دومینیون قطعه سنده بر چوق كوللر بولنیور، كه اكثریسی بر طاقم نهرلر واسطه سیله بینلرنده ودكیزله دخی

اختلاط ایدرلر. بو كوللرك اك بیوكلری ((اسیرلر كولی ایله )) ایله (آسینیبوىۀ) و (اوییبغ) كوللری اولوب، اطرافلرنده بر چوق كوچكلری دخی واردر. ممالك مجتمعه ایله دومنییون آره سنده دخی بربرلرندن یوكسك و (نیاغاره) كبی بیوك شلاله لر تشكیلیله بربرینه دوكیله رك (سنت لوران) ایرماغنی تشكیل ایدن درت بیوك كول واردر، كه میشیغان، هورون، اریه واونتاریو اسملریله معروفدرلر. آمریقای جنوبیده داىٔمی بیوك كوللر آز ایسه ده یاغمورلر موسمنده واسع اووه لرده جسیم كوللر تشكیل ایدر. آمریقا ماىٔله لرینك وسعتی بروجه زیر ذكر اولنور: (آمریقای شمالیده) ١ _ بحر محیط شمالی ایله هودسون دكیزی ماىٔله سی : مربع كیلومتره ماكنزیا حوضه سی ٤۰۰۰ ساسقاچاوان )) ٣٥۰۰ ٢ _ بحر محیط كبیر ماىٔله سی : آلاسقه ده كی یوقون حوضه سی ٣٥۰۰ انكلیز قولومبیاسنده كی فراسر حوضه سی ١٢٥۰ اورغونده كی قولومبیا حوصه سی ٢٥۰۰ قولورادو نهری حوضه سی ٢٥۰۰ ٣ _ بحر محیط آطلاسی ماىٔله سی : سنت لوران حوضه سی ٣٥۰۰ میسیسیپی )) ٧٥۰۰ ریو نورته )) ٣٥۰۰ (آمریقای جنوبیده) ماغدالنا حوضه سی )) ١٦۰۰ اورنوق )) ٢٤۰۰ ساىٔو فرانسسقو حوضه سی ٢٩۰۰ پارانا حوضه سی ٥۰۰۰ هواسی. _ آمریقا قطعه سی قطب شمالیدن قطب جنوبی داىٔره سنه قدر ممتد اولوب، خط استوانك آلتندن چكدیكیچون، اقطار مختلفه سنده هوالرك جمله سی موجود اولمق طبیعی ایسه ده، عمومیت اوزره هر یری اقلیمنك اقتضاسنه نسبتله صوىٔوقدر. مثلا منطقۀ حاره ده كی ممالكی آسیا وآفریقا ممالك حاره سی قدر صیجاق اولمدیغی كبی، آوروپا وآسیاده اقالیم معتدله دن معدود اولان درجهۀ عرضده دخی پك صوىٔوق هوالی یرلر بولنیور. بوده قطب شمالی وقطب جنوبی یه ناظر اولان یوزلری آچیق اولوب، بوزلردن كلن صوىٔوق روزكارلره سپر اوله جق قطبلره متوازی

طاغلری اولمامسندن؛ منطقۀ حاره نك بر قسمنده كی قره سی پك طار اولوب، قسم جنوبیسنده كی راضیسی دحی پك چوق نهرلرله سقی اولنه رق، اورمانلرله مستور اولمسندن؛ قطبلردن كلن صوىٔوق آقندیلرك ایكی طرفده كی ساحللر بوینجه خط استوایه قدر جریانندن؛ وبرده مرتفع وسرمدی قارلرله مستور طاغلر هواسنك آلچق یرلرك دخی هواسنی تعدیل ایتمسندن ایلری كلیور. كرك آمریقای شمالی وكرك آمریقای جنوبیده اقالیم معتدله یوق حكمنده اولوب، اسكیمولر ممالكی ودومینیون صحرالریله پاتاغونیانك صوك درجه ده اولان صوىٔوغندن بردن بره ممالك مجتمعه ایله لاپلاته وبرازیلیانك صیجاقلرینه چكیلیر. صوىٔوق موسمله صیجاق موسم آره سنده كی تبدل دخی بویله بردن بره اولور، كه نو حال آمریقا هواسیچون بر بیوك محذوردر. اقسیمه تابع اولان بو هوا تقسیماتندن بشقه، ارتفاعه تابع بر هوا تغیری واردر، كه باشلیجه آمریقای جنوبی ووسطیده حكمی جاریدر. آند سلسلۀ جبالیله آمریقای وسطی طاغلرینك اك مرتفع ذروه لری داىٔمی صورتده قارله مستور اولوب، خط استوانك آلتنده بیله ارتفاعدن حاصل بر قطب هواسی بولنمغله، طاغلرك اتكلرینه طوغری اینلدكجه، هوا كسب اعتدال ایده رك، نهایت دكیز ساحللرنده غایت صیجاق وصاری صیتمه تخمنی حاوی متعفن بر هوایه تصادف اولنور. بو وجهله مكسیقه ایله آمریقای وسطیده وقولومبیا، اقوآدور، پرو وبولیویاده ارتفاعه تابع صیجاق، معتدل وصوىٔوق هوالی یرلر بولنوب، اكثر قصبه لر معتدل هوال اولان بر قاچ بیك متره لك ارتفاعلرده بولنیور. آمریقای شمالیده یاغمورلر موسمه تابع اولمدیغی حالده، آمریقای جنوبیده یاغمور موسمی تشرین ثانیدن مایسه قدر دوام ایدر ؛ وبو یاغمورلر آند سلسلۀ جبالنك شرق طرفنده كی اراضیٔ واسعه یه مخصوص اولوب، سلسلۀ مذكوره نك غربنده وبحر محیط كبیره ناظر اولان اتكلرده و اووه لرده داىٔمی صورتده برقوراقلق حكم سورر: وبو طرفك اراضیسی یالكز سلسلۀ جبالدن سیل حالنده آقان قیصه نهرلرله اسقا اولنه رق، اكثر یرلری قوملق وغیر منبتدر. محصولاتی، نباتات ومعادنی. _ آمریقانك ارا-

ضیسی عمومیت اوزره منبت ومخصولدار اولوب، الآن آنجق بر قسم جزیىٔسی ایشلندیكی حالده، كلیتلی حبوباتله برابله، توتون، شكر قامشی، پاموق، چوید، قاقاىٔو، وانیله، قهوه، پتاته، قینه قینه، ضمغ، رچینه، هندستان جویزی وساىٔر بهاراتله اجزای طبیعه نك انواعی حاصل اولور. آمریقای شمالینك دومینمون اراضیٔ واسعه سنده ١۰۰ متره قدر ارتفاعی اولان دوم دوز برنوع چام یتیشدیكی كبی، ممالك مجتمعه نك بعض طرفلرنده دخی ١٢ و ١٦ متره محیط داىٔره سی بولنان چنار وساىٔره آغاجلری واردر. برازیلیا ایله آمریقای جنوبینك ساىٔر بعض طرفلرنده ماىٔون وآقاژو كبی نیجه ذقیمت اشجارله برابر انواع كراسته آغاجلری بالطه كورمه مش پایانسز اورمانلر تشكیل ایدیورلر. آلتون و كومش معدنلری آمریقانك اكثر طرفلرنده، و علی الخصوص پرو، شیلی، مكسیقه وقالیفورنیاده پك كلیتلی اولوب، حتی بعض یرلرده یر یوزنده آچیقده بیله تصادف اولنور. ممالك مجتمعه ده كلیتلی دمیر وكمور معدنلریله توكنمز غاز یعنی طاش یاغی، و ممالك مذكوره نك جهت غربیه سنده باقیر معدنلری وپروده باقیر معدنیله برابر كیتلی جیوه چیقار. برازلیاده كثرتله الماس قیالی طاغلریله مكسیقه نك بعض جهتلری قورو و طاشلق اولوب. دنیانك هیچ بر طرفنه بكزمز غریب برشكلده كورینور، وبو محللرده فرنك انجیری آغاجی قبیلندن یاپراقسز وساده كوتور صورتنده قیصه داللری بولنان عجیب بر طاقم آغاجلر یتیشیر. حیواناتی . _ آمریقانك كندینه مخصوص حیواناتی اولوب، اقطار شمالیه ده بولنان بیاض آییلرله تیلكی وفوق دنیلن حیوان بحر ایله (رن) تعبیر اولنان مأنوس بر نوع كیكدن بشقه آمریقانك اسكی دنیا ایله مشترك هیچ بر حیوانی یوقدر دنیله بیلیر. حیوانات مخصوصه سنك بر طاقمی بزم بیلدیكمز حیواناتك بعض جنسلرینه بكزیورسه ده، نوعلری او جنسدن اولدقلرینه ایناندیره میه جق قدر مختلفدر. آمریقای شمالی صحرالرینك قسم شمالیسنده (پیزون) دنیلن بر نوع صیغرله بو نوع مسك آهوسی یبانی حالنده سوریلرله كزدكلری كبی، آمریقای وسطیده و آمریقای جنوبینك قسم شمالیسنده دخی آرسلان وقپلانه مشابه (قوغار) و (یا-

غوآرا) نامیله ایكی جنس ییرتیجی حیوان بولنور. طوموزه مشابه (بفاری) و (پاتیرا) اسملریله دخی ایكی جنس حیوان واردر. آكل النمل حیوانات مختلفه سی دخی چوقدر. آمریقای كندینه مخصوص حیوانات مأنوسه سی (لامه) و (ویغون) دنیلن ایكی جنس حیواندن عبارتدر، كه بونلر یوك ایچون قوللانلدقلری كبی، یپاغیلری دخی آلنیر. آنجق آوروپالیلر آمریقاده برلشدكدن صكره آوروپانك كافۀ حیوانات مأنوسه سی اورایه نقل اولنه رق، نو كون هر طرفنده كلیتله بولنمقده در. تقسیمات سیاسیه سی. _ آمریقانك كشفنده اهالیسی پك آز اولوب، اونلرك دخی اكثریسی بر حال وحشیتده یاشار واكثریسی آوجیلقله كچینیر بر حالده بولنمش؛ وچوبانلقله اوغراشانلر‌ هیچ اولمیوب، حیوانات مأنوسه لری اصلا اولمدیغی كبی، زراعتله توغل ایدنلری دخی پك آز ایدی. بناءً علیه او وقت آمریقا قطعه سنك تقسیمات سیاسیه سی اولمیوب، یالكز مكسیقه ایله پروده بولنان اهالىٔ قدیمه نك نوعما حضریتلری وار ایدی، و اورالرده بربرینی متعاقب بعض دولتلر تشكیل ایتمشیدی. بوجماعتلری دخی اوروپا فاتحلری محو وپریشان ایدوب، اهالىٔ اصلیه نك قسم كلیسنی غدارانه قلیجدن چكیرمكله، قالانلری دخی طاغلره، واسع صحرالرك ایج طرفلرینه وبالطه كورمه مش اورمانلرك ایچنه چكلمكله مجبور اولمغله، آمریقا اراضیسی كاملاً اوروپا مهاجرلرینك الینه چكمشیدی. بو وجهله آمریقانك هر طرفی اوراسنی ضبط واسكان ایدن قومه كوره، آوروپا دولتلرندن برینك مستملكاتی حكمنه، و اكثریسی اسپانیا ایله پورتكیز و انكلتره نك، بعضیسی دخی فلمكنك، فرانسه و دانیمارقه نك الینه چكمشیدی. آمریقانك بویله چفتلك كبی اوروپا دولتلرینك تحت تصرفنده بولندیغی بو استملاك دوری بر قاچ عصر سوردكدن صكره، نهایت مستملكاتده اوروپالیلرله اهالىٔ قدیمه دن آفریقادن منقول اسرادن مركب وممزوج اولان اهالی قیام ایله، سلاحه صاریله رق، بربرلرینی متعاقب كسب استعلال ایتمكله، یالكز آمریقای شمالینك اقصای شمالنده كی (دومینیون) قطعه سیله، آمریقای جنوبیده كی (غویانه) قطعه سی و (آنتیل) جزایری الآن اوروپا مستملكاتی حالنده

قالوب، ساىٔر طرفلرك كافه سی مستقل آمریقا دولتلری صورتنه كیرمشلردر. بو دولتلرك بعضیسی طریق ترقیده قطع مراحل ایده رك، اوروپا دولتلرینی بیله چكمش، و بعضیسی كوندن كونه ترقی ایده رك، اوروپا دول متمدنه سنك حالنه تقرب ایتمكله باشلامش ایسه ده، بعضیسی دخی الآن محاربات ومناقشات داخلیه آلتنده بولنوب، لایقی وجهله ترقی وجهله ترقی ایده مه مشلردر. اك متمدنلری ممالك مجتمعه اولوب، ایكنجی درجه ده برازیلیا ایمپراطور لغیله آرجنتین جمهوریتیدر. آمریقانك تقسیمات سیاسیه سیله مساحه ونفوسلری بروجه زیر ذكر اولنور : (آمریقای شمالی) ممالك مربع كیلومتره اهالی ١ انكلتره نك النده كی دومینیون ٨٨٢٢٥٨٣ ٤٣٢٤٨١۰ ٢ ممالك مجتمعه مع الآسقه ٩٢١٢٢٧۰ ٥۰٤٤٥٣٣٢ ٣ مكسیقه ١٩٤٦٢٩٢ ١۰٤٤٧٩٧٤ ٤ آمریقای وسطی ٥٤٥٩۰۰ مربع كیلومتره اهالی ٢٧٨٨٨٧٣ [ ١ غوآ تماله ١٢١١٤۰ ١٣٥٧٩۰۰ ٢ سالوادرو ١٨٧٢۰ ٦٣٤١٢۰ ٣ نیقاراغوآ ١٣٣٨۰۰ ٢٥٩٧٩٤ ٤ هوندوراس ١٢۰٤٨۰ ٣٢٣٢٧٤ ٥ قوسته ریقه ٥١٧٦۰ ٢١٣٧٨٥] ٥ آنتیل جزایری ٢٤١۰۰۰ ٤٢۰٢۰۰۰ جمعاً آمریقای شمالی ٢۰٦٦٨۰٤٥ ٧٢١٩٨٩٩٣ (آمریقای جنوبی) ٦ قولومبیا (یكی غرناطه) ٨٢۰٧۰۰ ٣۰۰۰۰۰۰ ٧ ونزوىٔلا ١٦٣٩٣٩٨ ٢١٩٨٣٢۰ ٨ اقوآدور ٦٥۰٩٣٨ ١۰۰٤٦٥١ ٩ پرو ١۰٤٩٢٧۰ ٢٩٧١٩٢٤ ١۰ بولیویا ١١٣٩٢٥۰ ٢٣۰٣۰۰۰ ١١ شیلی ٧٥٣٢١٦ ٢٥٢٦٩٦٩ ١٢ آرجنتین ٢٨٣٥٩٧۰ ٢٩٤٢۰۰۰ ١٣ اوروغوآی ١٨٦٩٢۰ ٥٨٢٨٥٨ ١٤ پاراغوآی ٢٣٨٢٩۰ ٤٣۰۰۰۰ ١٥ برازیلیا ٨٣٣٧٢١٨ ١٢٩١٣٣٣٧٥ ١٦ غویانه ٤٦١٩٧٧ كیلومتره ٣٤۰٦٧٦ اهالی { فرانسه نك النده كی ١٢١٤١٣ ٢٦٥۰٢ فلمنكك )) ١١٩٣٢١ ٧٤١٣٢ انكلتره نك )) ٢٢١٢٤٣ ٢٧۰۰٤٢ } جمعاً آمریقای قطعه سی ٣٨٧٩١١٩٢ ١۰٣٤٦٢٧٦٦ اهالینك جنسیت وادیانی. _ بو اهالینك ایچنده آنجق اوچ درت ملیون اصل یرلی و اوكا قریب بر

مقدار دخی یرلی ایله آوروپالیدن مركب اولوب، قصوری كاملاً اوروپالی ایله بونلر معرفتیله آفریقادن كتیرلمش زنجیلردن عبارتدر. برازیلیا قطعه سنك اهالیسی پورتكیزلی اولوب، ساىٔر بتون آفریقای جنوبی اهالیسی عمومیت اوزره اسپانیولدر. آمریقای شمالیدن ایسه آمریقای وسطی ایله مكسیقه و آنتیل جزایرینك اكثریت اهالیسی ینه اسپانیول اولوب، ممالك مجتمعه ایله دومینون قطعه سنك اهالیسی دخی انكلیز ویالكز قناده طرفلرنده كیل فرانسزدر. آنجق اكثریت وعمومیت اوزره آمریقایی ضبط ایتمش اولان بو اوچ جنسیته یعنی اسپانیول پورتكیزلی وانكلیزلره آوروپانك هر طرفندن كل یوم هجرت ایتمكده اولان آلمان، ایتالیان، فرانسز، اسوجلی، روس وساىٔر اقوام مختلفه افرادی قارشیمقده در. مع هذا هر مملكته هجرت ایدنلر اوراده اولجه یرلشوب اكثریت قزانمش اولان جنسیتك لساننی قبول ایده رك، یواش یواش كندی جنسیتلرینی غاىٔب ایدرلر. انكلیزكر، اخلاق وعادات ملیه لری اقتضاسنجه نه اصل یرلیلرله ونه ده آفریقا زنجیلریله قاریشمیه رق، آیریجه یاشامقده وبلكه اهالىٔ قدیمه یی همان كاملاً امحا ایتدكلری كبی، زنجیلرك دخی وجودینی قالدیرمغه چالیشمقده اولدقلری حالده، اسپانیوللرله پورتكیزلیلر بالعكس كرك یرلیلرله وكرك زنجیلرله قاریشدقلرندن، بونلرك بولندقلری یرلرده خالص اسپانیول ویا پورتكیزلی پك آز قالوب، بو اوچ مختلف جنسدن متولد ملز بر جنس اهالی حاصل اولمشدر. علی الخصوص مكسیقه ده اهالىٔ قدیمه دن كلیتلی افراد بولندقلری كبی، ساىٔر اهالینك ده اكثریسی بو ملز جنسیته منسوبدرلر، وبونلرك ده طاقمی السنۀ قدیمه لرینی محافظه یتمشلردر. آمریقای اهالیسنك اسپانیول، پورتكیز وفرانسز جنسیتنه منسوب اولانلری قتولیك، و انكلیز، آلمان، دانیمارقه لی و فلمنكلی جنسیتلرینه منسوب اولانلری دخی پروتستاندر. بناءً علیه، آمریقای شمالیده اكثریت پروتستانلرده، وآمریقای جنوبیده قتولیكلرده در. زنجیلرله حضرینه كیرمش اولان اصل یرلیلر دخی اوروپالیلرك دین ولساننه تابع اولمشلردر. حال وحشیتده یاشایان یرلیلر ایسه كندی لسانلریله متكلم

اولدقلری كبی، ادیان غربیۀ قدیمه لرنده دخی ثابت قدمددلر. آمریقا قطعه سی پك بیوك و اقالیم مختلفه یی حاوی اولدیغندن، اوزرنده ساكن بولنان اهالىٔ اصلیۀ قدیمه سنك شكل وسیما ورنكجه متحد اولملری ممكن اولمیوب، لسانلری بسبتون مختلف ومتعدد اولدیغی كبی، شكل و سیمالری دخی اقلیمه كوره مختلف و متنوع ایسه ده، اقطار شمالیه ده بوزلرده سالن بولنان ومغول جنسنه قربیتلری اولان اسكیمولردن ماعدا بتون آمریقا اهالىٔ اصلیه سی آره سنده مشترك بعض علامتلر وباخصوص باقیر ویا دارچین رنكنه مشابه بر رنك بولنیور. آمریقا اهالىٔ اصلیه سی اسكی دنیاده كی اجناس بشرك هیچ برینه بكزمیوب، كندیلرینه مخصوص بر جنس تشكیل ایدیورلر، كه رنكی حسبیله ((قرمزی آدملر)) تعبیریله تفریق اولنه كلمشدر. بو جنسی تركیب ایدن اقوامك افرادی كیتدكجه آزالمقده ولسانلری یواش یواش محو اولمقده اولوب، الیوم موجود اولانلرینك باشلیجه لری بروجه زیر تعداد اولنور : آمریقای شمالیده ١ كنای اقوامی سنقه كینا اونیدا قوتا قایوغه قولوش وساىٔره توسقاووره ٢ آتاپاسقه اقوامی ٥ داقوته اقوامی ٣ آلغونكین اقوامی ٦ آپالاش اقوامی قری ناچز اوتاوه موسقوكی میكماق وساىٔره شرمه كی ٤ ایروقوآ اقوامی ٧ آراپاهو اقوامی اونوداغه آمریقای وسطیده ٨ آزنك اقوامی ١٢ تاراسق قومی ٩ تولتك )) ١٣ اوتومی )) ١۰ میكستك )) ١٤ مایه )) ١١ زاپوتك )) ١٥ كیشه )) آمریقای جنوبیده ١٦ غوآرانی اقوامی ٢۰ غوآیقورو اقوامی قراثب وساىٔره ٢١ اوراىٔوقان )) ١٨ كیریری )) ٢٣ تهوىٔل )) ١٩ كیشوآ آیماره اقوامی احوال تاریخیه سی . _ درتیوز سنه اول بو

قطعۀ جسیمه نك وجودندن اسكی دنیاده كی آدملرك اصلا خبر و معلوماتی اولمیوب، اسپانیا وپورتكیزك عرب اهل اسلامی النده بولندقلری زمانلرده بحر محیط آطلاسی سواحلنه قدر توسیع ملك ایتمش اولان مجاهدین اسلام بو بحر مظلمك ایچنده و اوته سنده نه وار مراقیله، و تعبیر آخرله آمریقانك كشفی مقصدیله (اشبونه) یعنی لیسبونه اسكله سندن كمیلرله تحریاته كیریشمشلردیسه سه، سیاحت بحریه لرنده دوامه موفق اوله مامشلدی. آز مدت صكره ینه اهل اسلامك اسپانیاده براقدیغی معارف تخملرینك ثمره سی اولمق اوزره، میلادك ١٤٩٢ تاریخنده (قریستوف قولومب) اسمنده بر جنوه لی، ارضك كرویتنه استناداً، غرب طریقیله هنده كیتمك مقصدیله، اوچ كمی ایله اسپانیادن حركتله، ابتدا (لوقای) جزایرینك برینی، بعده (قوبه) ایله (اسپانیوله) یعنی (سنت دومینغ) آطه لرینی، وبر سنه صكره اجرا ایتدیكی بر ایكنجی سیاحتده آنتیل آطه لرینك دیكر بر قاچنی كشف ایتمش ایدی. ١٤٩٨ ده قریستوف قولومب آمریقای جنوبینك (اورنوق) منصبی جوارلرنده كی سواحلنی كشف ایدیكی كبی، بر سنه اول انكلتره دن تحری یه كوندرلمش اولان قپودان (قابوت) دخی (ترنو) جزیره سیله آمریقای شمالینك بعض سواحلنی كشف ایتمشیدی. بو كشفیاتك اوزرینه بونك جسیم بر قطعه اوله جغی آكلاشیله رق، ذاتاً پورتكیز قپودانلرندن (پدرو آلوارز قابرال) دخی غرب طریقیله هنده كیتمك نیتیله سیاحت ایدر كن، تصادفاً برازیلیا ساحلنه اوغرامش اولدیغندن، بر طرفدن اسپانیا وپورتكیز طرفندن آمریقای جنوبی ووسطی ایله مكسیقه وقالیفورنیا طرفلرینه، وبر طرفدن دخی انكلتره دولتی طرفندن آسیانك شمالندن هند وچین دكیزلرینه بحری بر طریق آچمق فكریله آمریقای شمالی یه كوندریلن فیلولر وعسكرلر تدریجی تدریجی آمریقا اقطارینی كشف وضبط ایتمشلردر. آلتون ومكوش ایله ذی قیمت طاشلرك كثرتی حقنده شیوع بولان مبالغه لی روایتلر اوروپاده و علی الخصوص اسپانیا وپورتكیزده عوام ناسك اعصاب طمعنی تحریك ایده رك، فوج فوج سرسریلر او طرفه شتاب ایتمكله، بیچاره اهالىٔ اصلیه حقنده انواع مظالمی ارتكاب ایده رك، بر

قاچ بیك كشی او قوجه قطعه نك صاحب مستقللری حكمنه چكمشلردی. بو وجهله تدریجی تدریجی بتون آمریقا آوروپا دولتلرینك و علی الخصوص اسپابیا، پورتكیز و انكلتره نك مستملكاتی حالنه كیروب، بونلر اللرینه چكن اراضیٔ واسعه یی ایشلتمك ایچون، آفریقادن كمیلر طولوسیله زنجی اسراسی كتیره رك، بیچاره لری آیاقلرنده زنجیر اولدیغی حالده، وباشلری اوزرندن قیرباج اكسیك اولمقسزین، یوركلر طیانمیه جق صورتده بر عذارلقله چالیشدیرمغه باشلامشلردی. نهایت بو مستملكاتده ساكن اولان اوروپالیلر كندی وطن اصلیلرینی طانیمیوب، استقلال هوسنه دوشمكله، بر طاقم اختلالات ومحاربات خونریزانه دن صكره، بربرلرینی متعاقب كسب استقلال ایده رك، مستقل جمهوریتلر وهیىٔات متفقه تشكیل ایتمشلردر. زنجیلرك اسارتده طوتیلوب طوتلمامسی دخی آمریقا دولتلرنجه بر بیوك مسىٔله اولوب، ممالك مجتمعه ده بونك ایچون بیوك بر محاربۀ داخلیه وقوعندن صكره، اسارت لغو ایدلمش اولدیغی كبی، آمریقای جنوبینك اكثر طرفلرنده دخی اسارت ملغا اولوب، بو دفعه برازیلیاده دخی لغو اولنمشدر. مع هذا بیچاره زنجیلر هر طرفده وهر طرفدن زیاده حریتده بتون عالمه سبقت ایدن ممالك مجعتمه ده اسارتك بر بشقه درلوسی اولان برنوع ذلت وحقارتده یاشامغله محكومدرلر. حتی بونلرك بر طاقمی بو حالی تحمل ایده میه رك، وطن اصلیلرینه عودتله، آفریقانك ساحل غربیسنده (لیبریا) اسمیله معروف بر جمهوریت تشكیل ایتمشلردر.