Albanie ~ آلبانيا
Kamus-ul'Alam - Albanie ~ آلبانيا maddesi. Sayfa: 289 - Sira: 4
Albanie - آلبانيا
زمان قدیمده یونان وروما جغرافیونی طرفندن ابتدا قافقاسیانك داغستان وشیروان طرفلرینه ویریلن اسمدر. بعده اك اول بطلمیوس طرفندن آرناؤدلغه دخی بو اسم ویرلمشدر. اسقوچیانك قدیمی دخی (آلبانی) یاخود (آلبانیا) اولدیغندن بربرندن بو قدر اوزاق اولان بو اوچ مملكتك بویله بر اسم مشتركله تسمیه لری جغرافیون ومورخینی حیرتده براقمغله، كیمی آرناؤدلرك واسقوچیالرك قافقاسیانك او جهتندن كلمش اولدقلرینه، وكیمی دخی بو اوچ مملكتك اوچی ده طاغلق اولمق مناسبتیله كلت لساننده ((طاغ)) دیمك اولان (آلب) كلمه سندن مأخوذ اوله رق آلبانیا تسمیه اولندقلرینه ذاهب اولمشدر. بز (آربانیا) و (آرناؤدلق) ماده لرنده آرناؤلغه ویریلن (آلبانیا) اسمنك آرناؤدجه (آربانیا) كلمه سندن غلط اولدیغنی، وبونك ((چفتجی)) دیمك اولان (آربان) كلمه سندن مشتق اولوب، الیوم آرناؤدلر بیننده بو صورتله مستعمل اولدیغنی اسبات ایتدیكمز ایچون،بو اسمك آرناؤدلغه وضعی
جهتنجه ((طاغلق)) معناسیله كلتجه دن مأخوذ اولدیغنی قبول ایده میز. كلت قومی ایسه آرناؤدلرك اجدادی اولان ایلیریانلرله بر اصلدن منشعب اولوب، لسانلری دخی بربرلرینه قریب اولدیغندن، احتمال كه اونلر دخی ((چفتجی)) معناسیله بویله بر اسمله كندیلرینی و كندیلرینه نسبتله وطنلری اولان اسقوچیایی تسمیه ایتمشلردر. داغستان وشیروانك بو اسمله تسمیه سی ایسه اقوام آریه نك، آسیای وسطیدن آوروپایه چكركن، اوراده بر خیلی مدت مكث ویا افرادلرندن بر طاقمنی اورایه ترك ایتمش اولملرندن ایلری كلمش اولمق محتملدر. [((آرناؤدلق))، ((داغستان)) و ((شیروان)) ماده لرینه مراجعت بیوریله.]
Kamusul Alam, Şemseddin Sami; Kamusul Alamde Albanie maddesi. osmanlıcada Albanie ne demek, Albanie anlamı manası, Albanie osmanlıca nasıl yazılır. Osmanlıca sözlükte Albanie hakkında bilgi. Arapça Albanie ne demek. Arapça osmanlıca sözlük. Farsçada Albanie anlamı
Kamusul Alamde - آلبانيا Albanie maddesi. Şemseddin Sami, Kamusul Alam Ansiklopedisi