Alp Tekin - آلب تكین

آل بویه زماننده ظهور ایدن امرای اتراكدن اولوب، بغداد امارتنده بولنان عزالدوله بختیارك معیتنده اولدیغی حالده، ینه امرای اتراكدن سبكتكین ایله برابر بر طاقم حركات سركشانه ده بولنه رق، خلیفه طایع لامرالله ایله پدر مخلوعی مطیع لامر اللهی دخی برابر آلوب، واسطه كیدر كن، اوراده بولنان بختیارله محاربه یه طوتیشوب، مغلوب اولمغله، شام طرفلرینه قاچمشیدی. او اثناده مصره ده حكومت سورمكده اولان فاطمیون طرفندن شامده (ریان) اسمنده‌ بر خادم والی بولنوب، اهالی ظلم وفتنه دن بیزار اولمغله، آلب تكینی شامی ضبط واداره ایتمكه دعوت ایدنجه، آلب تكین دخی ریانی اورادن اخراجله، خلیفۀ عباسی نامنه خطبه اوقوتمش، وقرامطه نك النده بولنان سوریه سواحلنك اكثر طرفلرینی ضبط ایده رك، عادتا بر دولت تشكیل ایتمشدر. مصرده كی فاطمیونه دخی مدارا ایتمكله، او صره ده معزلدین اللهك وفاتی اوزرینه تخته اوتورمش اولان عزیز كندیسنی مصره دعوت ایتمش ایسه ده، آلب تكین امنیت ایده میه رك، امتناع ایتدیكندن، عزیز بونك اوزرینه عسكر كوندرمش؛ و آلب تكین قرامطه ایله عقد وفاق ایده رك، مصردن جوهر اسمنده بر ذاتك قومانده سیله كلمش اولان مغربیلری مغلوب وعسقلانده محاصره ایتمكله، جوهرك امان دیلمسی اوزرینه، مصره عودت ایتمك اوزره، مساعده ایتمشدر. بونك اوزرینه عزیز كلیتلی بر عسكرله بالذات شامه عزیمت ایدوب، وقوع بولان محاربه لرده آلب تكینك جسارتنی تقدیر ایتمكله، صلحی تكلیف ایتمش ایسه ده، آلب تكین رد ایله جواب ویرمش؛ و محاربه نك دوامیله، نهایت فاطمیون غالب كلوب، آلب تكین اسیر دوشمش. عزیز بوكا ینه فوق العاده حرمت ورعایت ایده رك، مصره كوتورمش؛ واوراده مقربینی صره سنه چكیرمش

ایسه ده، وزیری یعقوب بن كلسی بونی چكه میه رك، ٣٦٤ تاریخنده تسمیم ایتدیرمشدر. عرب تاریخلرنده (الفتكین) صورتنده مضبوطدر.