Adana - آطنه

قضاسی. اطنه ولایت وسنجاغنك مركزی قضاسی اولوب، سنجاغك شرق

جنوبی قسمندن عبارت اولمغله، جنوباً بحر سفیدله، شرقاً جبل بركت سنجاغیله، شمالاً عیسالی قضاسیله، غرباً دخی طرسوس قضاسیله محدود ومحاط، وبر وجه آتی ٨ ناحیه یی جامعدر : مهاجرین؛ قره طاش، مسیس، سرقنطی، قارصندی، یوره كیر، جانب شهر، قره حاجیلو. بونلردن صوك اوچی قربیتلری جهتیله مركزدن اداره اولنوب، دیكر بشنك مدیرلری واردر. بو قضانك اراضیسی كاملاً چقور اووه ده واقع اولوب، آطنه ولایتنك اك منبت محلیدر. آطنه قضاسنك، ١۰٧۰۰ مسلم و ١٢٢٥ خرستیان اهالی یه مخصوص اوله رق، جمعاً ١١٩٢٥ خانه سی، تقریباً ٥۰۰۰۰ نفوسی، ١٨ جامع شریفی، ٣٨ مسجدی، بر رشدیه مكتبی، ٢٥ صبیان مكتبی، ٣٥ مدرسه سی، ٨ تكیه سی، ٥ كلیساسی، ٤ حمامی، ٥٥ دكیرمنی، ١ دباغخانه سی، ٥ بویا باصمه خانه سی و ٧ فابریقه سی واردر.