Adana - آطنه

ولایتی. آطنه ولایتی آناطولی قطعه سنك سواحل جنوبیه سنك نصفنی یعنی شرق قسمنی حاوی اوله رق، جهت شرقیه سنده شماله طوغری خیلی متدادله اناطولینك وسطلرینه قدر واصل اولور. بو ولایت شرقاً حلب، شمالاً سیواس، انقره وقونیه، غرباً ینه قونیه ولایتلریله وجنوباً بحر سفیدله محدود ومحاط اولوب، قبریس جزیره سنك قارشیسنده بولنیور. مساحۀ سطحیه سی تقریباً ٥۰۰۰۰ مربع كیلومتره اولوب، اهالیسی ٣٥۰۰۰۰ نفوس راده لرنده در، كه بونلرك آنجق بر خمسی ارمنی وملل ساىٔره یه منسوب اولوب، اكثریتی اهل اسلم وتركدر مركزك ولایت جوارلرنده بر مقدار نصیری عرب وجبل بركتك شرق طرفلرنده كرد عشیرتلری بولنیور. ولایت آطنه، ایج ایل، قوزان وجبل بركت ناملریله درت سنجاغه منقسم اولوب، مركزلرله برابر ١٩ قضایی حاویدر. ولایتك قسم غربیسندن عبارت اولان ایج ایل سنجاغی طاغلق بر یر اولدیغی كبی، ولایتك قسم شمالیسندن عبارت

اولان قوزان سنجاغی دخی طاغلق اولوب، ایج ایل وقوزان طاغلری مشهوردر. اورته ده قالان آطنه سنجاغی قونیه ولایتندن حدودینی آیران بلغار طاغنك اتكلریله چقور اووه دن، وجبل بركت لواسی دخی بین العوام (كاور طاغی) دنیلن وشمالدن جنوبه طوغری سنجاغنك اورته سندن چكن جبل بر كتله اونك اتكلرندن عبارتدر. بو وجهله ولایتك اكثر طرفلری طاغلق اولوب، چقور اووه ایسه اطراف ثلثه سی بو طاغلرله محاط ویالكز جنوب طرفی دكیزه قدر آچیق واسع بر اووه در، كه (سیحان)‌ و (جیحان) كبی شمالدن كلن ایكی بیوك نهر بو اووه نك ایچندن چكرلر. چقور اووه دنیانك اك كوزل اراضیسندن معدود اولوب، غایت منبت ایسه ده، چه فاىٔده كه یالكز لدوس روزكارینه آچیق اولوب، زیاده صیجاق اولدیغندن، ونهرلرك طاشمه سیله حاصل اولان بطاقلقلردن یازین هواسی پك صیتمه لی اولدیغندن، اهالی وعمله طیانه میور، وبناءً علیه اكثر طرفلری بطال قالیور. بونكله برابر آطنه ولایتی آتاطولینك اك حاصلاتلی ولایاتندن اولوب، كلیتلی بغدای، آرپه، پاموق، پرنج، سوسام، كتن تخمی، شكر قامشی، توتون ‌وساىٔره حصلاتی ویرر. هر نوع میوه لری دخی چوق اولوب، اوزومندن شراب حاصلاتی دخی واردر. طاغلرنده اورمانلر چوق اولوب، چام، آردیج، میشه، شمشاد كبی آغاجلری چوقدر، وكسیلن كراسته دن خیلی اخراجات اولدیغی كبی، قطران ولدین دخی چیقاریلیر. ایج ایل طاغلرنده وجبل بر كتك بعض طرفلرنده كلیتلی یبان زیتون آغاجلری بولنیور. معدنلری دخی چوق ایسه ده، هیج بری ایشلنمه مكده در. معدن صولری ده چوقدر. ذكر اولنان سیحان وجیحان نهرلرندن بشقه ایج ایل سنجاغندن اینن كوك صو‌دخی خیلی بیوك بر ایرماقدر. بواوچ ایرماغه ویا طوغریدن طوغری یه دكیزه دوكیلن ایكنجی درجه ده كی نهرلری دخی پك چوق اولوب، بونلرك اك بیوكلری بردان، كورسون صو، قزیل ایرماق، قره صو وساىٔره در. طاغلرك ومرتفع محللرك هواسی سرین وغایت صاغلامدر. اورمانلرده كلیتلی كیك وساىٔر آو حیوانلریله قپلان دخی بولنور. اهالینك اغنام وصیغیر ودوه واستر كبی حیوانات بیتیه لری چوقدر. صنایع ملیه پك

كری اولوب، باشلیجه كلیم وچول كبی منسوجاتله بعض كومش معمولاتندن وسختیاندن عبارتدر. بر نوع قالین بز دخی یاپیلیر. قونیه وقیصریه وساىٔر آناطولی طرفریله ایشلیان یوللری، بلغار طاغنده كی (كولك) بوغازندن چكدیكیچون، صعب المرور ایدیسه ده، اخیراً تسویه اولنوب، مكمل بر شوسه یاپلمشدر. برنجی اسكله سی اولان (مرسین) دن (طرسوس) شهرندن چكه رك، مركز ولایته قدر والیٔ اسبق عابدین پاشا حضرتلرینك همتیله بو صوك سنه لرده بر دمیر یول دخی یاپیلوب، ایشلمكده در. بو ولایتك حاوی اولدیغی قطعه حدود طبیعیه ایله آیرلمش اولدیغندن، اسكیدن بری بر قطعه عد واعتبار اولنه رق، زمان قدیمده (كیلیكیا) اسمیله معروف واكثریسنك خرابه لری بولنان بر چوق قدیم شهر وقصبه لری حاوی ایدی. یونانیلر ساحللرنده بعض قصبه لر تأسیس ایدوب، یرلشمشلردیسه ده، ایج طرفلری وسواحلك ده اكریسی اهالیٔ اصلیه نك النده ایدی. اسكی كیلیكیالیلر سریانی امتنك شعباتندن بر قوم ‌اولوب،‌اقلیم اقتضاسنجه سوریه سریانیلرندن دها بیاض اولدقلرندن، یونانیلر بونلره ((بیاض سریانیلر))‌ دخی دیرلردی. كیخسروك خروجنده كیلیكیا ایرانك ضبطنه چكمش، بعده بیوك اسكندر طرفندن فتح اولنوب، بونك وفاتنده (سلفقوس) سلاله سنك حصه سنه دوشمش، وبر آره لق مصر بطالسه سنك الینه چكمش، وصكره بر طاقم قورصانلرك ملجنی اولمغله، رومالیلر بونلرك تنكیلی وسیله سیله مملكتی‌ دخی ضبط ایتمشلردی. حضرت عمر فاروق زماننده اصحاب كرامدن ابو عبیده بن الجراح وابو موسی الاشعری قومانده سیله بر سریه كوندریلوب، بو مملكت فتح اولنمش ایسه ده، بعده اهمال اولنه رق، نهایت ١٤۰ تاریخ هجریسنده خلفای عباسیه دن منصور بو طرفده كی فتوحاتی یكیدن‌ احیا، وهارون تشكل ایتمش اولان ملوك حمدانیه نك ونهایت قونیه سلچوقیلرینك الینه چكمشیدی. ارطغرل غازی آسیای وسطیدن آناطولی یه كلدیكنده، رفقاسی طرف طرف یرلشدیرلدكلری صره ده، (بوزاوقلی) خانك قبیله سی دخی آطنه طاغلرنده یرلشدیریلوب، شمدیكی اهالیٔ جبال اونلرك نسلندن اولدقلری كبی، ایج ایل طرفنه

دخی كلیتلی تركمان قبانلی توطین اولنمشیدی. دولت سلچوقیه نك انقراضنده مذكور (بوزاوقلی) خانك اولادندن (یوره كیر) ك اوغلی رمضان بك دخی ساىٔر رؤسا مثللو آطنه طرفلرنده اعلان استقلال ایله، ٧٨۰ دن ٩٧۰ تاریخنه قدر ١٩۰ سنه حكومت سورن (رمضان اوغللری) فاملیاسنك مؤسسی اولمشدر. بونلر ایكیده برده مصر چراكسه سیله محاربه ومقاتله دن خالی اولمدقلرندن، یاوز سلطان سلیم حضرتلرینك مصر اوزرینه اولان سفرنده مملكتی پادشاه مشارالیهه تسلیم ایتمشلرسه ده، سلاطین عثمانیه حضراتی اكثریا ینه كندیلرندن والی تعیین ایده رك،‌ ادارۀ مملكت ایتدیرمشلری. آنجق عشایرك دره بكلری كیف مایشا حركت ایتدكلرندن، ١٢٨۰ ده بونلرك اداره سنه ختام ویریله رك، چقور اووه واطرافنده كی طاغلر تحت اطاعته آلنمش، و ١٢٨٤ ده آطنه وقوزان جبل بركت ملحق بولندقلری حلب ولایتندن وایج ایل سنجاغی دخی قونیه ولایتندن آیریلوب، برلشدیریله رك، آطنه ولایتی تشكیل اولنمشدر.