Ebu Hattab Bin Dıhye - ابو الخطاب بن دحیه

(عمر بن حسن) اندلسك مشاهیر محدثین و ادباسندن اولوب، نسبی پدرندن صحابه دن (دحیة الكلبی) یه، و والده سندن حضرت امام حسین بن علی یه منتهی اولدیغندن، (ذوالنسین) دنیمكله دخی معروفدر. نحو ولغت و حدیث و اشعار و اخبار عربده ید طولی صاحبی اولوب، استماع احادیث شریفه مقصدیله اندلسك اكثر جهاتنی دور ایتدكدن صكره، مراكش، مصر، حجاز، شام، عراق، خراسان وساىٔر بلاده سیر وسیاحت ایتمش؛ و مصرده ملك عادل طرفندن اوغلی كاملك مؤدبلكنه نصب اولنه رق، شاكردی اولان شارالیه ملك كاملك زماننده پك چوق حرمت و اعتباره ناىٔل اولمشیدی. اربلدن چكركن، اورانك صاحبی ملك معظم الدین ایله كوریشوب، بونك نامنه بر مولد شریف منظومه سی یازمشیدی. دیكر تصنیفاتی بروجه آتیدر: ((العلم المشهور فی فضاىٔل الایام و الشهور))، ((الآیات البینات فی ذكر مافی اعضاء الرسول من المعجزات))، ((شرح اسماء النی))، ((النبراس فی اخبار‌ خلفاء بنی العباس))، ((الاعلام المبین فی المفاضلة بین اهل صفین))، اشعاری دخی كوزل اولوب، بعض قصاىٔدی واردر. ٥٨٧ تاریخنده طوغوب، ٦٣٣ ده وفات ایتمشدر.