İbni Temiyye - ابن تمييه

(تقی الدین احمد بن عبد الحلیم حرانی) آنف الترجمه فخرالدینك اقرباسندن اولوب، كوچك ایكن حراندن دمشقه هجرتله، تا صباوتنده علوم و فنونده و علی الخصوص علم تفسیرده شهرت بوله رق، بیودیكنده، عصرینك فریدی، و علمانك امام و مقتداسی اولمشیدی. پك چوق تصنیفاتی اولوب، اك مشهورلری شونلردر : ٢ بیوك جلددن عبارت ((كتاب فی الموافقة بین المعقول و المنقول))، ٦ جلددن عبارت ((بیان تلبیس الحمیمیه فی تأسیس بدعهم الكلامیه))، بر قاچ جلد اوزره ((جواب الاعتراضات المصریه علی الفتیا الحمویه))، ((منهاج السنة النبویه فی بعض كلام الشیعة و القدریه))، خرستیانلره قارشی دریه اولمق اوزره، ((الجواب الصحیح لمن بدل دین المسیح))، ٢ جلد اوزره ((كتاب الاستفامة))، ((كتاب الایمان))، ((تنبیه الرجل العاقل علی تمویه المجادل))، ٢ جلد اوزره ((كتاب الرد علی كسروان الرافضه))، ((كتاب فی الرد علی المنطق))، ((كتاب فی الوسیلة))، ((كتاب فی الاستغاثة))، ((بیان الدلیل علی بطلان التحلیل))، ((الصارم المسلول علی شاتم الرسول))، ((المستقیم فی مخالفة الصحاب الحجیم))،

((التحریر فی مسىٔلة جفیر ))، ((رفع الملام الاىٔمة الاعلام))، ((السیاسة الشرعیه اصلاح الراعی والرعیه))، ((تفضیل صالحی الناس علی ساىٔر الاجناس))، ((التحفة العراقیه فی الاعمال القلبیه))، ((كتاب الفرقان بین اولیاء الرحمن و حزب الشیطان))، ((المساىٔل الاسكندریه علی الملاحدة الاتحادیة بالسبعینیه)). علی و فضلنك كثرتی بر طاقم حسودلرك خصومتنی ایقاط ایتمكله، مراعیلرك سلسلۀ تعصبی تحریك اولنه رق، كندیسی مصره جلب، وحبسه القا، واعدامنه دخی سعی اولنمش ایسه ده، بر مدت محبوس طوردقدن صكره، قورتلمش؛ و آنجق ینه متعصب و حسودلرك تعقیبتدن خلاص بوله میوب، ٧٢٦ ده ینه حبس اولنمش، و ایكی سنه صكره وفات ایتمشدر. مع هذا جنازه سنه آلتمش بیك كشیدن زیاده خلق طوپلانمشیدی