İbni Tilmiz - ابن تلميذ

(امین الدوله ابو الحسن هبة الله بن ابو الغناىٔم) اك مشهور اطبای عربدن اولوب، كندیسی نصرانی المذهب اولدیغی حالده، ادبیات عربیه ده دخی طولی صاحبی بر شاعر فصیح اللسان و سریانی و فارسی لسانلرینه دخی واقف ایدی. فن طبده مهارت و حذاقتی فوق العاده اولوب، تشخیص امراض و تداوىٔ مرضاده كوسترمش اولدیغی غراىٔب احوال كتب نوادرده مشهوردر. بغدادده كی بیمارستان عضدینك مدیری وسرطبیبی اولوب، وفاتنه قدر بو خدمتده بولنمش؛ و خلفای عباسیه نك پك چوق حرمت و اعتبارینه مخهر اولمش

ایدی. اخلاقی دخی زیاده سیله ممدوح اولوب، هله علوجناب و قناعتی بر درجه ده ایمش، كه ملوكدن بشقه كیمسه دن اجرت آلمیوب، ساىٔر ناسه مجاناً باقر؛ و علی الخصوص علما و فقهایی خسته خانه ده براقمیه رق، خسته خنه نك قارشیسنده كاىٔن كندی خانه سنه نقل ایله، ایی ایتدكدن صكره، محتاج اولانلرینه عطیه دخی ویررمش. خلیفه مستضیٔ بامراللهك خدمت طبابنی صاحب ترجمه ایله یهودی المذهب اولان اوحدالزمان ابو البركاته محول اولوب، بو ایكی ذات بیننده منافرت بولندیغی كبی اخلاقجه دخی مباینت وارایدی. ابن تلمیذ نه قدر خوشطبع و متواضع و قناعتكار ایدیسه ده، ابو البركات او قدر خودپسند و متكبر و طمعكار ایدی. ابو البركات طبده صاحب ترجمه دن پك دون ایدیسه ده، حكمت و فلسفه علملرنده دها ایلری ایدی. ابن تلمیذ ٤٦٦ تاریخنده طوغوب، ٥٦۰ ده وفات ایتمشدر. مدت عمرنده یالكز اجرای طبابتله اكتفا ایتمیوب، علوم طبیه نك تدریسیله دخی اشتغال ایدر، و حلقۀ تدریسنه بر چوق طالبان علمم معرفت طوپلانمغله، خیلی حاذق طبیبلر یتیشدیرمشدر. خانه سی مجمع علما و ادبا اولوب، برواسع كتبخانه یه دخی مالك ایدی. باشلیجه تألیفاتی شونلردر : ((اقرباذینه))، ((اقرباذینه الموجز البیمارستانی))، ((المقالة الامینیة فی الادویة البیمارستانیه))، ((اختیار كتاب الحاوی اللرازی))، ((اختیار كتاب مسكویه فی الاشربة))، ((اختصار شرح جالینوس لكتاب تقدمة المعرفة لابقراط))، ((تتمة جوامع الاسكندرانین لكتاب حیلة البرٔ الجالینوس))، ((شرح مساىٔل حنین بن اسحاق))، ((شرح الحادیث نبویة تشتمل علی طب كناي))، ((الحواشی علی كتاب القانون للرىٔیس ابن سینا))، ((الحواشی علی كتاب الماىٔة للمسیحی))، ((التعالیق علی كتاب المنهاج))، ((مقالة فی الفصد))، ((كتاب یشتمل علی توقیعات و مراسلات))، ((تعالیق استخرج من كتاب المایة للمسیحی))، ((مختار من كتاب ابدال الادویة الجالینوس))، بونلرك اك مشهوری ((اقرباذینه)) اولوب، مدت مدیده اطبای اسلام بیننده دستور العمل طوتلمشدر. شو قطعه صاحب ترجمه نك جملۀ اشعار بلیغه سندندر : لاتعجبوا من حنین قلبی الیهم واعذروا غرامی فا لقوس مع كونها جمادا تىٔن من فرقة السهام