İbrahim Halebi - ابراهیم حلبی

(ابراهیم بن مصطفی بن ابراهیم الحنفی الحلبی المداری) اون ایكنجی قرن هجرینك اعلم علماسی اولوب، علم و فضیلتله بتون عالم اسلامده شهر تشعار اولمشیدی.

قرن مذكور اواىٔلنده حلبده دنیایه كلوب، ابتدا بر صنعتله مشغول ایكن، كوردیكی بر رؤیانك شیخ صالح مواهبی طرفندن واقع تعبیری اوزرینه، تحصیل علم ایچون، مصره كیده رك، علوم عقلیه یی تعلم ایله، یدی سنه صكره مملكتنه عودتنده، علوم تقلیه نك دخی لزوم و احتیاجنی حس ایتمكله، دمشقه كیدوب، عبدالغنی نابلسی كبی كبار علما و مشایخدن فقه و حدیث و تفسیر و تصوف كبی علوم شرعیه یی تحصیل ایتدكدن صكره، ایفای حج شریف ایچون، حجازه عزیمتله، مكۀ مكرمه ده دخی تحصیله دوام ایتمش؛ و بعده مصره عودت ایده رك، سید علی ضریردن علوم عقلیه و نقلیه یی استكمال ایله برابر، مشارالیهك تدریسده معاونی اولوب، خیلی استفاده ایتدیكی كبی، ساىٔر علمادن دخی قراىٔتله، نهایت مأذون اولوب، ((دررمختار)) و ((هدایت)) تدریسنه باشلامش؛ و ذكاوت و طلاقت فوق العاده سی حسبیله، آز زمانده مصرده مشارالیه بالبنان اولوب، هر طرفدن طلبۀ علوم هجومله، خلقۀ تدریسنه بر جم غفیر طوپلانمغه باشلامشیدی. او صره ده امرای مصریه دن‌ یوسف كتخدانك امامی اولمش؛ و بونك وفاتندن صكره امیر عثمان كبیره انتساب ایده رك، خیلی و ظاىٔف و حبهاته مالك اولمشیدی. بعض وقوعات اوزرینه اهالىٔ مصریه طرفندن بالوكاله درسعادته ورودنده، صدراعظم بولنان قوجه راغب پاشا ایله كورشمش؛ و صدر مشارالیه بو ذاتك علم و فضلنه مفتون اولوب، كندینه خواجه ایده رك، یاننه آلیقومشیدی. راغب پاشا حلبیدن خیلی علوم و فنون تعلم ایده رك، استفاده ایتدكدن صكره، مصر ملالغیله كندیسنی اعاده ایتمك ایستمش ایسه ده، اشیاسنی دخی كمی یه قومش ایكن، حسب القدر كری دونوب، استانبولده قالمش؛ و شیخ الاسلام وساىٔر علمأ زمانیله كسب مناسبت ایده رك، تدریس علومه باشلامش؛ وموصلۀ سلیمانیه پایه سنی احراز ایتمشیدی. او وقت پك اختیار و ضعیف البنیه اولدیغی حالده، كیجه و كوندوز مطالعه و تصنیفله اوغراشه رق، سلطان سلیم و آیاصوفیه ده تدریس ایدردی ؛ و حلقۀ تدریسنه بتون پایتخت علماسی طوپلانه رق، استفاده ایدرلردی. ١١٩۰ سنه سی ربیع الآخرنده رحمت حقه ناىٔل اوله رق، ابا ایوب انصاری حضرتلرینك جوا-

رنده دفن اولنمشدر. ((دررمختار)) ە بر حاشیه سی، ((شرح جواهر الكلام))، ((نظم السیره))، ((شرح لغزالبهاء العاملی)) عنوانلی تألیفلری، و عروض، و فوق، معما وساىٔر علومه متعلق متعدد رساله لری دخی واردر.