İbrahim Halebi - ابراهیم حلبی

اعاظم فقهاء حنفیه دن مشهور ((ملتقی الابحر)) ك مؤلفی اولان ذاتدر، كه طقوزنجی قرن هجری اواسطنده حلبده دنیایه كلوب، دمشقده و مصرده تكمیل تحصیل، و علی الخصوص علم فقهده ترسخ ایتدكدن صكره، درسعادته كله رك، قانونی سلطان سلیمان حضرتلری زماننده پایتخت علماسنی درسلریله مستفید ایتمش؛ و ٩٥٦ تاریخنده، ٩۰ یاشنده اولدیغی حالده، ارتحال ایتمشدر. یوقاریده ذكر اولنان تألیفی قدرری، مختار، كنز و وقایه كبی تألیفات معتبره نك خلاصه سی مقامنده اولوب، كافۀ قواعد فقهیه یی سهل و سلیس بر عباره ایله جامع اولمغله، الیوم ممالك عثمانیه نك هر طرفنده درس كتابی اتخاذ اولنه رق، ایادىٔ طلابده متداول اولدیغی كبی، ((منیة المصلی)) شرحی اولوب، مؤلفنك اسمیله مشهور اولان دیكر بر اثری دخی اعتقاداتده دستورالعمل حكمنده در بوندن بشقه فقهاء حنفیه نك تراجم احوالنی جامع ((طبقات الفقها)) نامیله دیكر بر اثری دخی واردر، كه كرك تاریخ و كرك فقه نقطۀ نظرندن اهمیتی میدانده در. بو جسیم جسیم اثرلر صاحب ترجمه نك علم و فضلنه و عالم اسلامه اولان خدمتنه برر شاهد عادل بولندقلرندن، زیاده مدح وتوصیفنه لزوم كورمیورز. _ ((سیر حلبی)) مؤلفی اولان (بر هان الدین علی حلبی)) بشقه در.