Attalie - آنطاليه

آناطولینك ساحل جنوبیسنده واقع آنطالیه كورفزینك ایچنده بر شهر و اسكله اولوب، قونیه ولایتنه ملحق تكه سنجاغنك مركزیدر. ً١٥ َ٥٢ ْ٣٦ عرض شمالی ایله َ٢٥ ْ٢٨ طول شرقیده، قونیه نك ٧٢ ساعت غرب جنوبیسنده ج اسپارطه نك ٣١ ساعت جنوبنده واقعدر. قصبه شمال جهتنده كسب ارتفاعی ایدن بر طاغك اتكنده اولوب، دكیزه ناظر بولنمغله، اوزاقدن منظره سی پك كوزل ایسه ده، سوقاقلری غیر منتظم و اولری اخشابدر. شمالنده كت طاغ پویرازه مانع اولمغله، یازین هواسی پك صیجاق و آغر اولدیغندن، اهالینك اكثریسی یایلالره كیتمكه مجبوردرلر. قصبه نك اوست طرفنده كی كوشك و باغچه لرك هواسی معتدلجه در. قصبه نك شمالنده كی طاغدن قصبه دن بر ساعتلق مسافه ده یردن بردن بره چیقان بر صویك یاریسی قصبه یه آقدیریله رق، باغچه وبوستاننی اسقا ایتمكده در. آنطالیه نك ٢١٢١ خانه سی و تقریباً ١٣۰۰۰ نفوسی اولوب، ٢٥۰۰ قدری خرستیان و قصوری كاملاً اسلام و جمله سی تركجه ایله متكلمدرلر. قصبه نك ایچنده بر رشدیه وبر قز مكتبی واردر. لیمانی ایكی ریختمله محفوظ اولوب، بو ریختملردن هر برینك اوجنده بر قله خرابه سی واردر. ازمیردن مرسین و اسكندرونه كیدن انكلیز و اپولری منتظم صورتده آنطالیه اسكله سنه اوغرادقلری كبی، بر چوق یلكن كمیلری دخی طاغلردن اسكله یه ایندیرلن اودون و كراسته لری یوكلنوب، اسكندریه یه وساىٔر طرفلره كوتورورلر. بو شهر میلاددن بر بچق عصر اول (پرغامه) حكمداری (ایكنجی آتال فیلادلف) طرفندن بنا اولنمشدر. شهرك ایچنده و اطرافنده بولنان آثار عتیقه او زمانلردن قالمه در. قصبه نك ٦٥ كیلومتره شرقنده اولوب، یرلیلر طرفندن (اسكی آنطالیه) تعبیر اولنان خرابه لر ایسه زمان قدیمده (سیده) تسمیه اولنان شهرك خرابه لریدر.

آنطالیه قضاسی تكه سنجاغنك مركزنده اولوب، اطراف شهر، استانوس، قزلقیا، بوجاق، سریك، بشقوناق اسملریله آلتی ناحیه دن مركبدر، و ١٩٥ قریه و جمعاً ٣٧٣ ١٣ خانه یی جامع اولوب، اهالیسی تقریباً ٦٦۰۰۰ كشیدر، كه نفس آنطالیه ده بولنان جزىٔی مقدار خرستیاندن بشقه كافه سی مسلمدر. درون قضاده ٦١ جامع شریف، ٤٨ مسجد، ٣٢ مدرسه واردر. قضانك حاصلاتی بغدای، آرپه، مصر، سیسام، بورجق، بو كرلجه وساىٔر حبوباتله زیتون لیمون، پورتقال، كتره، تورنج، اوزوم، جویز، الما، آرمود وساىٔر میوه لردن و پاموق، میان كو كی، توتون وساىٔره دن عبارتدر. اغنامی دخی چوق اولوب، كوزل یاغ چیقار. محصولات صناعیه سی باشلیجه ایپكلی و عادی كوملك بزیله كلیم، سجاده و سختیاندن عبارتدر. قضانك اورمانلری چوق اولوب،باشلیجه اسكله یه ایندیریلن اودون و كراسته آنطالیه نك اك بیوك تجارتیدر. [سنجاق ایچون ((تكه)) ماده سنه مراجعت بیوریله.]