Andaman - آندامان

بنكاله كورفزینك آچیقلرنده و شرق طرفنده بر طاقم آطه لردر. كه درت بیوك و بر چوق كوچك آطه لردن مركب اولوب، َ٣۰ ْ٩۰ طول شرقیده و ْ١۰ َ٢٥ ایله َ٣٤ ْ١٣ عرض شمالی آره سنده واقعدرلر. بونلرك اك اهمیتلیلری شمال طرفنده كی (بیوك آندامان) ایله (كوچك آندامان) جزیره لریدر. برنجیسی ٢٣۰ كیلومتره طولنده اولوب، طار بوغازلرله آیرلمش اوچ آطه دن مركبدر، كه شمالی وسطی و جنوبی اسملریله تفریق اولنورلر. بونلرك اكلری ٢٨ كیلومتره دن زیاده دكلدر. كوچك آندامان ایسه جنوبی آندامانك جنوبنده اولوب، بویی ٤٨ و اكی

٢٥ و نهایت ٢٨ كیلومتره در. بو درت جزیره نك اطرافنده بولنان كوچك آطه لرك باشلیجه لری : شمالی آندامان ایله (نغراییده) برونی آره سنده ویاری یولده واقع اولان (پرپاریس)؛ بو آطه ایله بیوك آندامان آره سنده اولان ((قوقه آطه لری )) ؛ بیوك آندامانك اطرافنده اولان (لاندفال)، اینترویف، ((بیوك قره قول)) وساىٔره ؛ جنوبی آطه نك ساحل جنوبیسی قارشیسنده بولنان (بوتلاند)؛ (دوتقان) بوغازنده اولان ((بش آطه لر ))، ((همشیره لر))، ((قرداشلر)) و ((كوچك قره قول)) آطه لریدر. بو جزایرك اطرافنده دها چوق قیالر و صیغلر واردر، كه سفاىٔنك تقربی حقنده پك تهلكه لیدر. بتون جزایرك مساحۀ سطحیه سی ٦٦۰۰ مربع كیلومتره قدر تخمین اولنمشدر. بو آطه لرك آراضیسی عمومیت اوزره طاغلق اولوب، شرق طرفلری دیكجه و صرب و غرب طرفلری سطح ماىٔل صورتنده در. بو طاغلرك اك یوكسكی بیوك آندامانك شمالی آطه سنده اولان (سدله مونتن) یعنی ((طوز طاغی)) اولوب، ٧٥۰ متره ارتفاعی واردر. نباتاتلری سوماتره جزیره سیله (ملاقه) شبه جزیره سی نباتاتنه مشابه اولوب، طاغلرك اكثریسی صیق اورمانلرله مستوردر. حیواناتلری ایسه آز اولوب، محلنه مخصوص یالكز بر جنس كوچك كوچك واردر. میمونلرله صیچانلر، ییلانلر و عقربلر پك كثرتلیدر. سواحلك اطرافنده بر چوق قوی و لیمانلر بولنوب، اك مهملری شمالی آطه ده كی (قورنو الیس) و جنونی آطه ده كی (قامپل) و (شانتام) لیمانلریدر. بو آطه لرك اهالىٔ اصلیه سی آنجق ١۰۰۰ كشی قدر اولوب، غایت قیصه بویلی (نغریتو) دنیلن بر نوع زنجیلردن معدوددرلر. عقل وذكاوتجه واصول تعیشجه انسانلرك اك كریده بولنانلرندن اولوب، حیواندن پك آز فرقلری اوله جق درجه ده بر حال وحشیتده یاشامقده درلر. معیشتلری دكیز قییلرنده طوپلادقلری میدیه واستریدیه قبیلندن حشرات بحریه دن عبارت اولوب، ساحللرده كزرلر، و موقت برر قبا قلبه یاپارلر. بونلر (مینقویی) اسمیله معروف اولوب، اسكیدن بری مردمخوار اولدقلری شهرت بولمش ایسه ده، احیراً اولنان تحقیقاتدن شمدیكی حالده مردمخوار اولمدقلری، و آنجق اجنبیلره بیوك بر كین

وخصومتلری اولوب، اللرینه دوشنلر حقنده مرحمتسزجه معامله ده بولندقلری، و اوق استعمالنده ماهر و جسور اولدقلری آكلاشلمشدر. اك اول بو آطه لر اوچنجی عصر هجریده عرب بحریونی طرفندن كشف اولنه رق، بعض كتب رحلتده ذكر، و اهالیسنك زنجی و مردمخوار اولوب، حیوانه قریب بر حال و حشیتده یاشادقلری بیان اولنمشدر. آورومانك بر چوق وقت معلوماتی كتب عربیه دن مأخوذ اولان بو تفصیلاتدن عبارت قالوب، نهایت بر عصر اول انكلتره نك هند حكومتی بونلری ضبط ایتمش؛ و او وقتدن بری احوال جغرافیه و طبیعیه لرینه داىٔر خیلی كتابلر یازلمش و تمامیله كشف اولنمشلردر. الیوم بو آطه لرك اوزرنده ۰۰۰ ١۰ كشی یه قریب انكلیز وساىٔر اجنبی اهالی بولنمقده در.