Alfeeri - آلفياری

یاخود آلفیری ایتالیانك اك مشهور هاىٔله نویس شعراسندن اولوب، میلادك ١٧٤٩ تاریخنده پیامونته نك (آستی) شهرنده طوغمش، و اسكی بر خاندانه منسوب اولوب، مشاهیر معماریندن آلفیارینك یكنی ایدی. پك كوچك یاشده ایكن، پدری وفات ایتمكله، تربیه سنه اعتنا اولنمیه رق، ایام شبابتی خووارده لق وسرسریلكله چكیردكدن صكره، (استو-

آرت) حانداننك اخیری اولان آلبانی قونتنك زوجه سی بولنان وكرك نسب وحیثیتجه كرك عقل وذكاجه پك عالی بر موقعده بولنان آلبانی قونتسه سنه تعشق ایتمكله، بو قادینه چاتمغه وسیله اوله بیلمك اوزره، شعر سویلمكله اوزنمش؛ وكرك شعرده كرك هاىٔله لرك صورت ترتیبنده یكی بر چیغر آچه رق، ٧ سنه ظرفنده ١٤ هاىٔله‌ میدانه قویمشدر، كه بونلرك بعضیسی عمومك فوق العاده رغبت وتحسیننه مظهر اولمشیدی. بر قاچ منظومه ایله بر طاقم منثور كتابلر دخی یازمش، وبتون تألیفاتنده حریت وجمهوریت فكرینه خدمت ایتمشدر. او صره ده استوآرتك وفاتیله طول قالان معشوقه سی لبانی قونتسه سیله خفیاً عقد ازدواج ایده رك، ((حریت مملكتی)) تسمیه ایتدیكی فرانسه یه نقل وطن ایتمش ایسه ده، ١٧٩٢ اختلالنده ظهور ایدن حالات مدهشه دن نفرت ایده رك، فلورانسه یه قاچمغله؛ ارباب اختلال كندیسنه مهاجر نظریله یاقه رق، فرانسه ده كی اموال واملاكنی ضبط ایتمشلردی. او وقتدن صكره آلفیاری فرانسه حقنده كی حسن ظننی وجمهوریته اولان محبتنی غاىٔب ایده رك، مؤحراً یازدیغی اثرلرده كرك فرانسه وكرك جمهوریت حقنده كی خصومتنی كوسترمشدر. آثار یونانیه نك متنلرینی آكلامق هوسیله، عمرینك اواخرنده لسان یونانی یی تحصیل ایله، شعرای یونانك بر طاقم هاىٔله لرینی ترجمه وتقلید ایتمشدر. ٥٤ یاشنده اولدیغی حالده، كثرت مشغولیتدن وفات ایدوب، آلبانی قونتسه سی كندیسنك كلیات آثارینی ٣٥ جلد اوزریته نشر ایتمشدر. كرك هاىٔله لری وكرك آثار منثوره سی پك مقبول اولوب، اكثر السنه یه ترجمه اولنمشدر.