Ala Dağ - آلا طاغ

بو نامله آناطولیده اوچ طاغ واردر: برنجیسی قسطمونی ولایتنده بولی سنجاغنك جنوب غربی كوشه سنده مدرلی ایله بولی قصبه لری آره سنده باشلیوب، شرق شمالی یه طوغری ممتد اوله رق، صرتی بولی سنجاغیله آنقره ولایتنك حدودینی تعیین، وجنوبده براقدیغی سقاریه حوضه سنی شمالده كی فلیاس حوضه سندن تفریق ایده رك، كنغری سنجاغی حدودینه قدر واصل اولور، واوراده ایشق طاغیله كسب ارتباط ایدر. بو طاغك طولی ١۰۰ كیلومتره قدر اولوب، شمالی ماىٔله سندن بولی وصوغانلی چایلری نبعان ایتدكلری كبی، جنوبی ماىٔله سندن دخی سقاریه تابعلرندن آلا صو ایله دیكر بر قاچ دره آقار. _ ایكنجیسی قونیه ولایتیله آطنه ولایتنك ایج ایل سنجاغی ره سنده ارتفاع ایده رك، زبانزدی (بلغارطاغی) اولان بوغا طاغنك مابعدی حكمنده اولمغله، جنوب غربی یه طوغری ممتد اوله رق، آنطالیه سنجاغی حدودینه قدر واصل اولور، واورادن شمال غربی وجنوب شرقی یه طوغری بر طقم قوللر صالار. بو صره بشقه بشقه ناملرله سیواس ولایتنك ایچندن چكه رك، ارضروم وطربزون ولایتلری آره سندن بالمرور قاوقاس طاغلرینه واصل اولور، كه زمان قدیمده (طاوروس) سلسله سی اسمیله معروف ایدی. بو اسمك ترجمه سی دیمك اولان (بوغا طاغی) ایسه بونك یالكز بر قسمنه علم اولمشدر. _ اوچنجیسی و ان كولنك شمالنده بایزید سنجاغنده اولوب، جنوب شرقیدن شمال غربی یه طوغری ٤۰ كیلومتره لك مسافه ده ممتد اولور. فرات ایرماغنك اك باشلیجه قولی اولان مراد نهری بوطاغك اطرافندن نبعان ایدر.