Assam - آسام

هندك شمال شرقیسنده بر خطه اولوب، غرباً نفس بنكاله، شمالاً (بوتان)، شمال شرقی طرفندن تیبت، جنوب شرقی طرفندن برما، جنوباً مانیپور، چكار، وجنتیه خطه لریله محاط ومحدود ایسه ده، بوصوك اوچ خطه دخی آسامه ملحقدر. تقریباً َ٣۰ ْ٢٥ ایله َ١٥ ْ٢٨ عرض شمالی و َ٢۰ ْ٨٨ ایله َ٤۰ ْ٩٤ طول شرقی آره سنده واقع اولوب، اك اوزون بویی (براهماپور) نهری وادیسنجه غربدن شرقه ٦٧٥ كیلومتره، واكی ٨۰ ایله ١١۰ كیلومتره آره سنده در. مساحۀ سطحیه سی انكلیزلرك رسمی استاتستیقلرنده ٧١۰۰۰ مربع كیلومتره كوستریلیور ایسه ده، حدودی تمامیله معین اولمدیغندن، بو مقدار بر آز مبالغه لی كورینیور. بو مملكت براهماپور نهر كبیرینك وادیسندن عبارت اولوب، بو نهرك شمالنده هیمالایه جبالنك بر اتكی اوزانیر؛ وجنوبنده دخی بنكاله اووه سندن وكلكته نك شمالندن باشلایه رق، شرقه طوغری اوزاندقجه یوكسكله رك، نهایت ٤۰۰۰ متره دن زیاده ارتفاعی اولان وداىٔمی صورتده قارله مستور بولنان بر سلسله یه ختام بولان بر صره طاغلر بولنور. بو ایكی سلسله دن بر چوق نهرلر آقوب، جمله سی براهماپور ایرماغنه دوكیلور. بو مملكتك هواسی بنكاله نك هواسنه بكزیورسه ده، خیلی دها معتدل اولوب، یازین سانتیغراد درجۀ حرارت ْ٢٧ ، وقیشین ْ١٤ راده لرنده بولنور. یاغمور موسمی نیسانك ابتداسندن باشلایوب، نشرین اولك نهایتنه قدر دوام ایدر. اك زیاده اسن شمال شرقی روزكاریدر. حركت ارض پك صیق وقوع بولور. اراضیسی خیلی منبت ایسه ده، اهالیسی پك چالیشقان دكلدر. باشلیجه محصولاتی

پرنجدن عبارت اولوب، حبوبات ساىٔره پك آزمقدارده زرع اولنور؛ حشحاش، آفیون، توتون، پاموق، شكر قامشی، چای محصولاتی دخی چوقدر. انكلیزلرك ورودندن اول چای آغاجلری خدایی نابت اولوب، اورمانلر تشكیل ایدیوردی؛ شمدی انكلیزلرك دلالتیله محصوصاً یتیشدیرلمكده، وكوندن كونه چوغالمقده در. پك چوق ضمغلی آغاجلری دخی واردر. معادنه متعلق دمیر ومعدن كوموری پك كلیتلی اولوب، نهرلرده بعضاً آلتون ریزه لری دخی بولنور. حیوانات وحشیه سی وعلی الخصوص فیل، كر كدان وقپلانلری‌ پك چوق اولوب، سنوی ٥۰۰ دن زیاده فیل طوتلدیغی حالده، مقدارلری آزالمامقده در؛ آیی، تیلكی وساىٔر آو حیوانلری دخی چوقدر؛ ونهرلر بالیقله طولو ایسه ده، براهماپور ایرماغنده تمساخلر دخی بولنور. تجارتی باشلیجه محصولات زرعیه سندن وعلی الخصوص چای وفیل دیشندن عبارت اولوب، صنایع محلیه ایسه فقرای اهالینك احتیاجاتنه مقابله ایده جك صورتده بعض پاموق، كتن وایپك منسوجاتیله دمیر وباقردن معمول بعض الآت وادواته مخصردر. اهالیسی ٧۰۰ ١٦٩٢ كشی اولوب، همان جمله سی براهما دیننه تابعدرلر. بونلر بر چوق اقوامه منقسم اولوب، سیما ولسانجه بر طاقمی تیبت تاتارلرینه، بر طاقمی بر ما اهالیسنه وبر طاقمی ده بنكاله هندولرینه مشابه وقریبدرلر. هندولره قریب اولانلرك ساىٔرلری اوزرینه تفوقلری واردر. آسام خطه سی بنكاله داىٔره سنی تركیب ایدن بش ایالتك بری اولوب، ٩ قضا و ١٦ ناحیه یه منقسمدر. قضالرك اسامی ومركزلری وجه آتی اوزره در : قضا مركز ١ كامپور كوهاتی ٢ خاسیه مع نتیه چرایونجی ٣ دراتك تزپور ٤ نوكنك نوكنك ٥ لكیمپور لكیمپور ٦ سیبساكار سیبساكار ٧ نكاهیل سماكوتنك ٨ كوالپاره _ ٩ كروهیل _

بو خطه ده كی شهرلرك اكثریسی صره سز ونظامسز بر طاقم كلبه لردن عبارت اولوب، اك بیوكلری ١۰۰۰۰ اهالیسی اولان (كوهاتی) شهریدر، (كیركنك) شهری دخی كاركیر خانه لی بیوك بر شهردر. دیكر قصبه لرك اك مشهورلری (سیبپور) و (جوارات) در. بو مملكت میلادك ١٨٢٦ تاریخنده انكلتره نك تحت تابعیتنه چكوب، ابتدا انكلیزلر بونی كندیلرینه عرض اطاعت ایتمش اولان بر راجه معرفتیله اداره ایتمشلر ایسه ده، ١٢ سنه صكره راجه نك وجودی قالقوب، طوغریدن طوغری یه انكلیز حكومتی طرفندن اداره اولنمغله باشلامشدر.