Azakı - آزاقي

(مولی محمد _) دشت قپچاقك آزاق شهرندن نشأت ایدوب، وطننده ابتدای تحصیل ایتدكدن صكره، استانبوله كله رك، بروجه معتاد دور مدارس ایله، نهایت ابو السعود افندینك حلقۀ تدریسنه داخل اوله رق، اكتساب فیوضات علمیه ایتمش؛ وغایت ذكی وفطین اولمغله، آز وقت ظرفنده علوم شرعیه ده ید طولی صاحبی اولوب، بر وقت مدرسلك ابتدكدن صكره، ١۰۰٥ تاریخ هجریسنده غازی سلطان محمد خان ثالث حصرتلرینك (اكری) سفرنده ركب سلطانی یه ملازمت ایدوب، پك چوق خدمتی كورلمكله، عودتنده سنان پاشا مدرسه سی مدرسلكنه، ومتعاقباً كفه مفتیلكنه نصب اولنمشیدی. ١۰١٢ تاریخنده ایكنجی دفعه اوله رق كفه مفتیلكنه نصب اولنوب، ١۰١٧ تاریخنده رحمت حقه ناىٔل اولمشدر. كفه مفتیسی ایكن، غازی كرای ایله برادری فتح كرای بیننده منازعه وقوع بولوب، تاتارلر ایكی طرف اولمش، وغازی كرای بافرمان عالی قریم خانی اولدیغی كبی، فتح كرایك آدملری دخی ركاب همایونه عرضحال تقدیمیله، فرمان همایون استحصال ایتمش اولدقلرندن، وقاضیٔ بلده دخی مؤخر اولان فرمان همایونك مقدمنی فسخ ایتدیكنی التزام ایده رك، فتخ كرایه حق ویرمكله، منازعه نك اشتدادینه سبب اولدیغندن، آزاقی افندی غازی كرای فرماننك صورت رسمیه ده صدور ایتمش اولدیغنی بالالتزام بونك لهنه فتوا ویره رك، منازعه یه ختام ویركمه موفق اولمشیدی.