Arslan - آرسلان

ایرانده وعراقده ٤٢٩ تاریخ هجر یسندن اعتباراً ١٦١ سنه سلطنت سورن سلچوقیلر شعبه سی ملوكنك اون اوچنجیسی اولوب، سكزنجی حكمداری اولان طغرلك اوغلی واون دردنجی حكمدار اولان دیكر طغرلك پدری ایدی. عمی سلیمان شاهك خلعندن صكره، ٥٥٦ تاریخ هجر یسنده تخته جلوس، وسلیمان شاهدن اول سلطنت سورمش اولان عمزاسه سی محمددن طول قالمش اولان خلفای عباسیه دن مقتفی باللهك كریمه سی كرمان خاتونی تزوج ایلمشدر. بو پادشاه مسمی بالنقیض اولوب، غایت حلیم وكوشك ویالكز كوزل یمك وكوزل البسه كیمیك مراقنده ایدی؛ رتق وفتق امور ایسه او كی پدری اولان (اتابك ایلدكز) ك النده ایدی. بو ذات آرسلانك عمیجه سی مسعدك كوله سی ایكن، صكره لری بعض بیوجك منصبلره نصب اولنمش، ومؤخراً طغرلدن طول قالان آرسلانك والده سنی تزوج ایتمش ایدی. آرسلانك تخته جلوس آنجق بو ذاتك همتیله اولدیغی كبی، مدت سلطنتنده دخی آرسلان یالكز اسماً پادشاه اولوب، حقیقةً پادشاهلق ایدن اتابك ایلدكز ایدی. حتی وفارس والیلری بولنان اینانج ایله ابن اقسنقر احمدیلی آرسلانه بیعت ایتمك ایستمدكلرندن، ایلدكز بعضاً بالذات وبعضاًده اوغلی پهلوانك قومانده سیله عسكر سوق ایده رك، بونلرله بالدفعات قومانده سیله عسكر سوق ایده رك، بونلرله بالدفعات محاربه ایتمش؛ وبیشابور طرفلرنده تفرد ایتمش اولان مؤیدی دخی، بینلرنده كی محبت ومصادقت یاردمیله، آرسلانك نامنه خطبه اوقومغه ارضا ایتمشیدی. آرسلان اون بش سنه ایله سكز آی سلطنت سوردكدن صكره، ٥٧١ تاریخ هجریسنده وفات ایدوب، اوغلی طغرل تختنه اوتورمشدر، كه سلچوقیلرك بو شعبه سنك صوك حكمداریدر.