Arslan Bin Selçuk - آرسلان‌بن‌سلچوق

سلچوقی سلطان طغرل بكك عمی اولوب، پدری سلچوق طرفندن ملوك سامانیه دن برینك بعض اقوام اتراكه قارشی امدادینه كوندریله رك سامانیلرك غالبیتنه خدمت ایتمش اولمغله، نفوذ وقوت صاحبی اولمش؛ وهجرت نبویه نك ٣٩۰ تاریخنده سامانیلر سلاله سی منقرض اولوب، بخارایی ایلك خان ضبط ایتدیكی وقت، آرسلان بخاراده بولنوب، اوصره ده ایلك خانك برادری بغراخانك محبسندن فرار ایدن علی تكین اسمنده بر بهادر آرسلانله بالاتفاق بخارایی ضبط ایتمش؛ وسلطان محمود سبكتكینك ترك ملوكنه كوندردیكی سفرایه ایراث خلل ایتدیكندن، سلطان محمود ٤٢۰ سنۀ هجریه سنده بلخدن قالقوب،

بخارانك اوزرینه یوروینجه، علی تكین قاچمش ایسه ده، آرسلان بخارانك خارجنده تحصن ایتمش؛ وسلطان محمود سبكتكین بونك قوتنی كورنجه، یلاندن دوستلق كوستره رك، حیله ایله یاننه جلبله، هندستانه كوندتوب، بر قلعه یه حبس ایتدیرمش؛ وطاىٔفه سنه جیخونك اوبریاقه سنه چكمكی امر ایتمش ایسه ده، بونلر اوراده بالاجتماع، بر بیوك قوت پیدا ایتدكلرندن، بر طاقمی خوارزمه، بر طاقمی عراقه وبر طاقمی دخی آذربایجانه كیده رك، بو یرلرك والیلری حقلرندن كله مه مكده ایدیلر. مؤخراً آرسلانك برادر زاده لری سلطان محمود سبكتكینك اوغلی ووارثی اولان سلطان مسعوددن آرسلانك اطلاقنی ایستمشلر ایسه ده، سلطان مسعود كندیلرینك عرض اطاعت ایتمسی شرطیله اطلاق وتسلیم ایده بیله جكنی بیان ایتدیكی حالده، بونلر بو شرطی قبول ایتمدكلرندن، آرسلان وفاتنه قدر محبسده قالمشدر.