Ahmed Paşa - احمد پاشا

(هزار پاره _ ) سلطان ابراهیم خان دورنده مسند صدارته ترفیع اولنان وزرادن اولوب، استانبوللیدر. بر سیاهینك اوغلی اولوب، طاوشان طاشی محله سنده طوغمشدر. سریع القلم و یازیسی كوزل بر كاتب اولمغله، ابتدا دفتردار افندینك خدمتنه كیرمش، وبعده صدر اعظم قره مصطفی پاشایه تذكره جی، و مؤخراً موقوفاتی و دفتر امینی اولمشیدی. ١۰٥٦ تاریخنده رتبۀ وزارتله دفتردار، و ١۰٥٧ ده ركاب همایون قاىٔممقامی اولمشیدی. محب اقبال و حریص جاه بر آدم اولمغله، او سنه صدارت عظمایی احرازه موفق و مصاهرت شرفنه دخی ناىٔل اولمشدر. یالكز اقبالنی دوشونوب، زماننده امور دولت چیغرندن چیقمش، و مناصب عادتا آقچه یه مقابل صاتلمغه باشلامش اولدیغندن، سوز آیاغه دوشوب، یكیچریلرله اسافل ناس طرفندن ظهوره كلن و سلطان ابراهیم خانك سلطنتنه ختام ویرن وقعه ده، صوفی محمد پاشانك صدارته تعییننی متقاقب اختفا ایتمش ایسه ده، بولنوب، اعدام اولنمش، و ارباب شورش طرفندن غایت ملحم اولان جثه سی پارچه پارچه كسیلمش اولدیغندن، (هزار پاره) لقبیله شهرت بولمشدر. مدت صدارتی یالكز اونبر آیدر.