İbrahim Paşa Avlunyalı - ابراهیم پاشاآولونيه‌لی

(آولونیه لی __) آرناؤدلقده كی آولونیه قصبه سی خاندانلرندن اولوب، آولونیه متصرفی وزیر قورد پاشا دامادی ایكن، قورد پاشانك وفاتندن صكره رتبۀ وزارتله آولونیه متصرفی اولمشیدی. تپه دلنلی علی‌ پاشا‌ مشارالیه قورد پاشانك بلوك پاشیسی ایكن، جسارت ودرایت فوق العاده سیله كورمش اولدیغی بعض خدمتلره مكافاةً، قورد پاشا كندیسنه قیزینی ویره جكنی و عد اییدیكی حالده، مؤخراً تبدیل افكارله، صاحب ترجمه ابراهیم پاشایی داماد ایتدیكندن، علی پاشا ابراهیم پاشا حقنده فوق العاده بن كین و خصومت حاصل ایتمكله، یانیه والیسی اولدقدن صكره، هم بونك انتقامنی آلمق و هم ده آولونیه سنجاغنی دخی كندینه ربطله، بتون طوسقه لغی ید تصرفنه كچیرمك مقصدیله، ابراهیم پاشایی محو ایتمك اوزره فرصته منظره ایدی. مع هذا ابراهیم پاشانك اوچ قیزلرندن بیوكنی ایكنجی اوغلی وزیر ولی پاشایه، اوكنجیسنی بیوك اوغلی مختار پاشایه و اوچنجیسنی ده همشیره زاده سی آدم بكه آلمشیدی. ١٢٢٤ تاریخنده مصرده محمد علی پاشانك معیتندن انفكاكله و طننه عسودت ایدن ویریونلی عمر پاشا، مصره كیتمزدن اول صاحب ترجمه ابراهیم پاشا طرفندن براتدن طرد ایدلمش اولمغله، اخذ ثاره مهیا اولدیغی كبی، علی پاشا دخی بونك آرزوسندن بالاستفاده، كندیسنی ابراهیم پاشایه مخالفت ایتمك اوزره، براته كوندرمشیدی. ابراهیم پاشا ویریونلی عمر پاشانك تشویقیله آیاغه قالقان مخالفین كروهنه مقاومت ایده میوب، مركز لوا اولان برات قلعه سنه قپانمش؛ و تپه دلنلی كویا قرابت صحریه غیرتیله كندیسنی اورادن قورتاروب، و طنی اولان آولونیه یه كتیرمش؛ و براتك اداره سی و كالةً عمر پاشایه

احاله اولنمشیدی. آنجق علی پاشانك انتریغه لریله عمر پاشانك حركات مخالفكارانه سنه ابراهیم پاشا آولونیه ده دخی مقاومت ایده میه رك، دوقات ناحیه سنه فراره مجبور اولمش؛ و تپه دلنلی بونی فرصت اتخاذ ایده رك، ینه ابراهیم پاشایی صحابت بهانه سیله، كندیسنی طوتوب یانیه یه كتیرمش؛ و آولونیه سنجاغنك موره متصرفلغندن معزول اوغلی ولی پاشایه تفویضنی عرض و انها ایتمشدر. باب عالیدن بوكا مساعده اولنمامش، و سلطان محمود ثانی حضرتلری طرفندن مفصل وشدید المأل بر خط همایون صارد اوله رق، تحقیق احواله بر مأمور مخصوص دخی كوندرلمش ایسه ده، تپه دلنلی اصرار ایتمش؛ وحتی ابراهیم پاشانك آناطولیده بر متصرفلغه نصبی اراده اولندیغی حالده، علی پاشا مشارالیهی كیتدكجه دها زیاده تضییق ایده رك، اوغلی سلیمان بكله برابر یانیه قلعه سنك قرانلق و درین بر بودرومنه قپامش؛ وقورد پاشا طرفندن ابتدا كندیسنه و عد اولنمش اولان حرمنی كندیسی تحت نكاحنه آلمشیدی. بیچاره ابراهیم پاشا، حرمی وقیزلری علی پاشانك سراینده و نعمت ایچنده بولندقلری حالده، كندیسیله اوغلی اولنجه یه قدر سنه لرجه اصلا ضیا كورمز بر بودرومده قالوب، دهشت انكیز بر فاجعه یه مبنی علیه اوله جق براختیارلق عمری سورمشدر. تپه دلنلی یی غضب پادشاهی یه دوشورن اصل بو وقعه اولوب، او وقت مساىٔل مهمه ایله اشتغال اولدیغی جهتله، تأدیبی وقت مرهونه تأخیر اولنمشیدی.