İbrahim Efendi - ابراهیم افندی

(روزنامچه جی _) بو دخی عن اصل موستارلی اولوب، حرم همایونده خزینۀ خاصه ده پرورده اولمش؛ و بعده بلوكه چیقوب، سلحدار كاتی و خوتین سفرنده سپاهیلر كاتبی، ومؤخراً مقابله جی و نهایت روزنامچه جی اولمشیدی. عاقل و مدبر بر ذات اولمغله، سلطان مراد رابع حضرتلرینك فوق العاده توجه و حسن ظننه مظهر اوله رق، هر بر معروضاتی طرف پادشاهیدن قبول بیورلدیغی شهرت بولمغله، قپوسی ارباب حاجتك مرجع و موردی اولمشیدی. مهام امور دولتده بیله رأی وتدبیرینه مراجعت اولنه رق، عادتا پادشاهك مشاور خاصی حكمنه كچمش ایكن، صاحب قناعت بر ذات اولدیغندن، روزنامچه جیلكله اكتفا ایدوب، دها بیوك بر مسند احرازینه رغبت ایتمه مشیدی. موقع و اعتبارینی آخر عمرینه قدر محافظه ایدوب، بغداد سفرنده موصل قربنده (جراحلی) منزلنده وفات ایتمشدر.