Avlona - آولونيه

فرانسزجه ورومجه ده آولونه ایتالیانجه ده و الونه واصل آرناؤدجه ده ولوره دنیلیر. یانیه ولایتنك برات سنجاغنده قضا مركزی بر قصبه در، كه براتك ٦۰ كیلومتره غرب جنوبیسنده ویانیه نك ١٣۰ كیلومتره غرب شمالیسنده ساحل بحردن ٢۰ دقیقه ایچریده واقع اولوب، آدریاتیق دكیزنده اولان اسكله سی خیلی ایشلك اولمغله، قصبه آرناؤدلغك اك تجارتكاه محللرندندر. اهالیسی تقریباً ٦٥۰۰ كشیدن عبارت اولوب، قسم اعظمی اسلامدر. درون شهرده اوچ درت جامع شریفله بر رشدیه مكتبی و، دردی اهالىٔ مسلمه یه ایكیسی ده خرستیانلره مخصوص اولمق اوزره، آلتی مكتب ابتداىٔی، ١٦۰ دكان و ٩ خان موجوددر. (موزاكه) اووه سنك منتهای جنوبنده بولنمغله، شمال جهتی آچیق اولوب، جنوب جهتنده لاپلق طاغلری كسب ارتفاع ایدیور. اطرافنده باغ و بوستانلر و كلیتلی زیتون آغاجلری بولنوب، آنجق بر طاقم طورغون صولر و بطاقلقلر بولنمغله برابر قصبه نك موقعی دخی چقورجه اولدیغندن، یازین هواسی آغر و صیتمه لیدر. بطاقلقلر قورودیلوب، قصبه دخی ساحله طوغری توسیع اولنه جق اولسه، اهمیت موقعیه و تجاریه سی حسبیله، آز زمان طرفنده ممالك عثمانیه نك آدریاتیق ساحلنده برنجی شهری حكمنه كچه جكنده شبهه یوقدر؛ چونكه اسكله سنك و علی الخصوص اسكله نك جنوب جهتنده بولنان (اویی فتوهته) یعنی ((صوىٔوق صو)) نام محلك هواسی غایت لطیف و صویی بینظیردر. حتی بعض اغنیانك اوراده یالی و كوشكلری واردر. آولونیه اسكله سنك جنوب جهتنده (پاشا لیمانی) نامیله پك واسع وغایت امین بر قوی واردر، كه بر دوننما استیعابنه كافیدر. تجارتنك اخراجات قسمی ایتالیا وتریسته ایله یونانه اخراج اولنان زیتون یاغیله مصر وساىٔر حبوباتدن وساده یاغ وپلاموطدن، و ادخالات قسمی دخی باشلیجه تریسته دن كلوب وسطی آرناؤدلغه نقل اولنان قهوه، شكر وساىٔر آوروپا امتعه سندن عبارتدر. آولونیه قضاسنده حاصل اولان زیتون

یاغی سنوی بر ملیون اوقه یه بالغ اولور. اسكله یه آمد شد ایدن یلكن كمیلری ٢٦۰ قطعه یی متجاوز اولوب، لویید قومپانیه سنك بر كوچك واپوری دخی هفته ده ایكی دفعه ایشلر. شهرك جوارنده بولنان طوزله دن سنوی بر بچق ملیون اوقه طوز آلینیر. آولونیه قصبه سی شمال شرقیسنده بولنان (آپولونیا) ونام دیكرله (پویان) شهر قدیمنك خرابیتندن صكره، اونك یرینی طوتمق اوزره، تأسیس اولنمش خیلی اسكی بر شهر اولوب، قرون وسطاده اهل صلیب طرفندن دفعاتله مركز ومبدأ هجوم اتخاذ اولنمش؛ و بعده موزاكه ده حكم سورن (بالاخیت) پرنسلرینك الینه كچوب، بونلر میلادك ١٤٦۰ تاریخنده سطوت عثمانیه یه مقاومت ایده مه مكله، شهری وندیكلیلره صاتمش؛ و ابو الفتح سلطان محمد خان ثانی حضرتلری زماننده خلیل پاشا معرفتیله فتح اولنه رق، ضمیمۀ ممالك عثمانیه اولمشدر. آولونیه قضاسنك ركنی حكمنده اولوب عن اصل قانینه لی اولان سنان پاشا زاده لر خاندانی طرفندن كرك درون شهرده و كرك قضاده اخیراً خیلی اعمارات اجرا اولنمشدر. آولونیه قضاسی نفس آولونیه قصبه سیله ٦٤ قریه یی جامع اولوب، تخمیمناً ۰۰۰ ٣۰ اهالیسی واردر. قضانك اطراف اربعه سی ٤٣ ساعت اولوب، غرباً بر طرفدن آدریاتیق وبر طرفدن یونان دكیزیله، جنوباً اركری سنجاغنك (قورولش) قضاسیله، شرقاً ینه اركری سنجاغنك تپه دلن قضاسیله، شمالاً دخی برات قضاسیله محدود و محاطدر. اراضیسی طاغلق اولوب، اك بیوك طاغی (لونغاره) دنیلن طاغدر، كه آولونیه نك اوستندن جنوب غربی یه طوغری اوزانیر. بو طاغ ایله بونك شرق جهتنده قارشیسنده بولنان (غریوا) طاغندن بر چوق چایلر آقوب، بو ایكی طاغك آره سنده (شوشیچه) نهرینی تشكیل ایدرلر، كه شماله طوغری جریانله، (ویوسه) ایرماغنه دوكیلور. لونغاره ایله بونك غرب جهتندن قارشیسنده بولنان (چیقه) طاغی آره سنده دخی (دوقات) چایی آقوب، پاشا لیماننه دوكیلور. مذكور چیقه طاغی ساحل بحر بوینجه شمال غربی یه طوغری اوزانه رق، پاشا لیماننی قپامق اوزره، (لینكته) بروننی تشكیل ایدر؛ و بو برونك منتهاسی قارشیسنده (سزان) اسمیله كوزل مرعالری، صوىٔوق صولری

و اوچ مناستری حوی اولان بر آطه بولنیور، كه اوزرنده پر فنار دخی ركز اولنمشدر. آولونیه قضا سنك وادیلرنده مقدار بغدای و آرپه و (ویوسه)