Antioche - آنطاكيه

سوریه نك جهت شمالیه سنده، حلب ولایت و سنجاغنده قضا مركزی بر شهردر، كه نهر عاصینك ساحل یساری قربنده، دكیزدن نهر عاصی وادیسنجه ٢٥ كیلومتره لك مسافه ده و حلبك ٩٥ كیلومتره غربنده، َ١٢ ْ٣٦ عرض شمالی ایله َ٤٨ ْ٣٣ طول شرقیده واقعدر. بو شهر بیوك اسكندرك رجالندن و ملكنی بینلرنده تقسیم ایدن طواىٔف ملوكدن سلفقوس طرفندن قبل المیلاد ٣۰١ سنه سنده پدری آنطیوخسك نامنه اوله رق تأسیس اولنوب، زمان قدیمده پك بیوك بر شهر ایدی. شهر قدیمی احاطه ایدن سور شمدیكی قصبه نك اطرافنده بولنان بر طاقم واسع باغچه و مزرعه لری دخی محیط اولمغله، اسكی بیوكلكنه بر دلیلدر. سلفكیانك پایتختی بولنمش، وسلا لۀ مذكوره حكمدارلری طرفندن بر چوق ابنیۀ مشهوره ایله تزیین و توسیع اولنمشیدی. رومالیلر سوریه یی فتح ایتدكلرنده، آنطاكیه شهرینه بر ادارۀ مختاره ویروب، امور داخلیه سنه قاریشمامشلردی. خرستیانلغك ظهورندن صكره دخی بو شهر اهمیت فوق العاده یی حاىٔز اولوب، حواریوندن بطروسك

تأسیس ایتدیكی بر پطریقلق مقامنك مركزی، و برقاچ مجلس روحانینك محل اجتماعی اولمشیدی. بر آره لق كسری نوشروانك ید ضبطنه كچوب، بعده ینه قسطنطینیه روم ایمپراطورلغی طرفندن استرداد اولنمشیدی. هجرت نبویه نك اون آلتنجی سنه سنده و حضرت عمر فاروقك زمان خلافتنده حضرت ابو عبیده نك همتیله فتح اولنه رق، ضمیمۀ ممالك اسلامیه اولمشدر. ٣٥٧ تاریخ هجریسنده روملرك الینه كچه رك، یوز سنه دن زیاده ایادىٔ نصاراده قالمش ایسه ده، ٤٧٧ ده سلاطین سلچوقیه دن سلیمان بن قتلمش استخلاص ایتمش؛ و ٤١٩ ده اهل صلیب ضبط ایتمكله، ٦٦٨ تاریخنه دك بونلرك النده قالدقدن صكر، تاریخ مذكورده ملك ظاهر ببرس فتح ایتمشدر. ٩٢١ تاریخنده یاوز سلطان سلیم خان حضرتلرینك ید جلادتلریله فتح اولنه رق، ضمیمۀ ممالك عثمانیه اولمشدر. آنجق آنطاكیه شهری بر طرفدن بربرینی متعاقب دوچار اولدیغی شدتلی زلزله لردن و بر طرفدن دخی وقوع بولان استیلالردن دفعاتله تخریب اولنه رق، اسكی معموریت و جسامتنی غاىٔب ایتمشدر. سرای، تیاترو، معبد، صویولی كبی ابنیۀ جسیمۀ قدیمه سندن بعضیسنك خرابه لری الیوم مشهوددر. شمدیكی حالده شهر اسكی موقعنك یالكز بر طرفنی ضبط ایدوب، آنجق ٨١٦ ١٦ اهالیسی واردر، كه بونلرك یالكز اوچ بیكه قریب مقداری خرستیان‌ و یهودی اولوب، قصوری كاملاً اسلامدر. موقعی غایت لطیف اولوب، شمال جهتنده عاصی نهری آقیور. جنوبنده لطیف بر طاغ واردر. دیكر ایكی طرفی دخی لیمون و پورتقال وساىٔر اشجار مثمره یی حاوی باغچه لرله مزین اووه دن عبارتدر. شهرك ایچنده ١٤ جامع شریف ایله متعدد مدرسه لر، بر رشدیه مكتبی وبر قاچ حمام واردر. آنطاكیه قضاسی سنجاغك غرب جهتنده اولوب، شمالاً اسكندرون قضاسیله و جنوباً لاذقیه سنجاغیله محدوددر. اراضیسنك قسم اعظمی طاغلق اولوب، منبت اووه لری دخی واردر. لیمون، پورتقال، زیتون و دود آغاجلری پك چوق اولوب، خیلی ایپك وزیتون یاغی چیقاریلیر. و پاموق دخی یتیشدیریلیر. اووه لرینك بعضیسی كرد و تركمان عشیرتلرینك قیشلاقلریدر. قضاده ایپكدن كوملكلك بز

و چارشف وطرابلس قوشاغی و مشلح یاپلدیغی كبی، سندیان آغاجندن چیغاره لق ویازی طاقمی مثللو بعض شیلر یاپیلیر. قیومجیلق و دمیرجیلك صنعتی دخی خیلی ایلریلمشدر. صابون دخی اعمال و اخراج اولنور. درون قضاده ١۰ مدرسه، ١ مكتب رشدیه و ٢١ مكاتب ابتداىٔیه بولنیور.