Amasya - آماسيه

سنجاغی، سیواس ولایتنی تركیب ایدن درت سنجاغك بری اولوب، ولایتك غرب شمالی قسمندن عبارت اولمغله، شرق وجنوب جهتندن توقاد سنجاغیله، غرب جنوبیدن آنقره ولایتنك یوزغاد سنجاغیله، غرب شمالیدن قسطمونی ولایتنك قسطمونی وسینوب سنجاقلریله، شمال شرقی طرفندن دخی طربزون ولایتنك جانیك سنجاغیله محدود ومحاطدر. اراضیسی عمومیت اوزره طاغلق ایسه ده، كوزل ومنبت اووه وبایرلری دخی چوقدر. طوزانلی نهری یوزغاد سنجاغندن كلوب، غرب جنوبیدن شرق شمالی یه طوغری جریانله، لوایی بر یاندن بر یانه شق ایتدكدن، ومركز لوا اولان آماسیه شهرینك ایچندن چكدكدن صكره، سنجاغك خارجنده یشیل ایرماغه منصب اولور. بو نهره صاغ وصولدن دوكیلن متعدد چایلر لوانك اراضیسنی اروا ایده رك، پك منبت وادیلر تشكیل ایتمكله، كلیتلی بغدای، آرپه، پرنج وساىٔر حبوباتله انفس میوه لرك انواعی حاصل اولور. قزیل ایرماق دخی سنجاغك غرب جهتنی سقی، و خیلی مسافه ده بو سنجاقله قسطمونی، سینوب وجانیك سنجاقلری آره سنده خط حدودی تشكیل ایدر. بوكا منصب اولمق اوزره دخی بر قاچ چای سنجاغك قسم شمالیسنی سقی ایدر. لوا بروجه آتی سكز قضایه منقسمدر : نفس آماسیه، مرزیفون، كوپری، مجید اوزی، عثمانجق، لادیق، حوضه، كموش حاجی كویی.