Amazones ~ آمازون
Kamus-ul'Alam - Amazones ~ آمازون maddesi. Sayfa: 356 - Sira: 2
Amazones - آمازون
یونان قدیمی تواریخنده كویا بو اسمله قره دكیزك شرق جنوبی طرفلرنده یعنی لازستان جوارلرنده صرف قادینلردن عبارت بر قوم بولندیغی بیان اولنیور. خرافات قبیلندن اولان بو روایته كوره، بو قادینلر یالكز ذریتلرینك دوامیچون موقناً قومشولری اولان اقوام ساىٔره ارككلریله برلشیر، و اركك اولادلرینی آتوب، یالكز قیزلرینی بیوتورلردی. بونلر جنكاور قادینلر اولدقلرندن، سلاح استعمالنه مانع اولمسون دیه، كویا صاغ ممه لرینی یاقه رق امحا ایتمك عادتلری ایمش. (هركول) وساىٔر یونان قهرمانلرینك آمازونلرله واقع محاربه لری یونان قدیم مورخ و شاعر ورساملرینه توكنمز بر سرمایه اولمشیدی. كویا بو قادینلر بر آره لق دولتلرینی شرقاً آثوریه یه وغرباً آطه لر دكیزینه قدر توسیع ایتمكله، ازمیر، مغنیسا وافس
(یعنی آیاصلوغ) شهرلرینی دخی اونلر بنا وتأسیس ایتمشلردی. آمازون ملكه لرندن بعضیلرینك اسملری دخی كتب قدیمۀ یونانیه ده محرر اولوب، بونلرك بری یونانیلره قارشی توروآلیلره یاردیمه كلمش و (آخیلاىٔس) طرفندن محاربه ده قتل ایدلمش اولان (ینتسیلیه)، وبری ده اسكندر ذو القرنینله كوریشن (تالستریس) در. _ آسیاده اولان بو آمازونلردن بشقه كویا آفریقاده دخی بویله آمازونلر بولنوب، بونلرك بر آره لق آفریقای شمالینك هر طرفنی ضبطله آسیای صغیره دخی چكمش، و اوراده یونان قهرمانی (هركول) طرفندن مغلوب وپرویشان ایدلمش اولدقلری خرافات یونانیه جمله سندندر. بو مصاللره سببیت وبرمك اوزره، آسیانك ذكر اولنان طرفنده وقتیله قادینلری جنكاور وحكمدارلری دخی قادین بر قوم بولنمش اولمسی وصرف قادینلردن مركب بر اردویه تصادف ایدلمش اولمسی دخی محتملدر. حتی میلادك سكزنجی عصرنده دخی چهستانده (لیبوسه) ایله (ولاسته) اسمنده ایكی قادینك تحت ریاستنده وصرف قادینلردن مركب بر عسكر ظهور ایدوب، اطرافی یغما وغارت ایتمكه باشلامشلردی، كه چهستان قرالی (پرزمیسلاو) بونلری دفع ایدنجه یه قدر پك چوق زحمت چكمشدر.
Kamusul Alam, Şemseddin Sami; Kamusul Alamde Amazones maddesi. osmanlıcada Amazones ne demek, Amazones anlamı manası, Amazones osmanlıca nasıl yazılır. Osmanlıca sözlükte Amazones hakkında bilgi. Arapça Amazones ne demek. Arapça osmanlıca sözlük. Farsçada Amazones anlamı
Kamusul Alamde - آمازون Amazones maddesi. Şemseddin Sami, Kamusul Alam Ansiklopedisi