3 Napoli Hükümdarları - ٣ ناپولى حكمدارلرى

٣ ناپولی حكمدارلری : برنجی آلفونس _ آراغون حكمداری صفتیله بشنجی آلفونس عد اولنان شخصك عینیدر. ایكنجی آلفونس _ برنجی فردیناندك اوغلی، وبشنجی آلفونسك‌ تورونی اولوب، میلادك ١٤٩٤ تاریخنده ناپولی تختنه اوتورمش ایسه ده، او سنه فرانسه قرالی سكزنجی شارل مماكنه تجاوزله، متفقلری وكندی تبعه سی دخی كندیسنی ترك ایتدكلرندن، تختی اوغلی ایكنجی فردینانده تركله، فرانسزلرك ناپولی یه دخولندن اول، سیچلیایه فرار ایدوب، او سنه اوراده وفات ایتمشدر. ٤ پورتكیز حكمدارلری : برنجی آلفونس هنریكز _ ((فاتح)) لقبیله ملقب اولوب، پورتكیزك برنجی حكمداریدر. پورتكیز قونتی بورغونیه لی هنرینك اوغلی اولوب، میلادك ١١۰٩ تاریخنده طوغمش؛ وپدرینك وفاتنده اوچ یاشنده اولمغله، كندیسی دخی ابتدا قونت عنواننی حاىٔز اولوب، بعده اندلس اهل اسلامنك الندن بر چوق یرلر ضبط ایتمكله، ممالكنی توسیع ایدنجه، حكمدارلغنی اعلان ایتمشیدی. میلادك ١١٤٧ تاریخنده لیسبونه (یعنی اشبونیه) شهرینی دخی عربلردن ضبط وپایتخت اتخاذ ایتدكدن صكره، قشتاله دن دخی بعض یرلر ضبط ایتمش ایسه ده، نهایت مغلوب واسیر اولوب، ضبط ایتدیكی یرلری اعاده ایتمك شرطیله خلاص بولمشیدی. پورتكیز دولتنك مؤسسی عد اولنور. ١١٨٥ تاریخنده وفات ایتمشدر. ایكنجی آلفونس _ ((شیشمان)) لقبیله ملقبدر. میلادك ١٢١١ تاریخندن ١٢٢٣ تاریخنه دك پورتكیز مختنده حكومت سوروب، اندلس اهل اسلامیله بر چوق محاربه لر ایتمش، و اهل صلیبدن بر فرقه معاو نتیله بعض غالبیتلره ناىٔل اولمشیدی. پورتكیز دولتیچون بر قانون وضع ایتمشدر. اوچنجی آلفونس _ ١٢٤٨ تاریخندن ١٢٧۰ تاریحنه دك پورتكیز حكمداری اولوب، ایكنجی آلفونسك ایكنجی اوغلی اولمغله، برادری ایكنجی (سانشه) نك وفاتنده تحته اوتورمش. وآلغارو (یعنی غرب) خطه سنی اندلس اهل اسلامنك الندن

آلوب، ممالكنده تجارت وصنایعك ترقیسنه چالیشمشدر. پاپا ایله اولان بعض اختلافاتی اوزرینه واتیقانك لعنتلمه سنه مظهر اولمشیدی. دردنجی آلفونس _ ((یكیت)) لقبیله ملقبدر. میلادك ١٣٢٥ تاریخندن ١٣٥٧ تاریخنه دك پورتكیز حكمداری اولوب، اوچنجی آلفونسك تورونی اولان (دینس) ك اوغلی ایدی. پدرینك حیاتنده بر قاچ دفعه عصیانله والدینك بادىْ موتی اولدیغی كبی، تخته جلوسندن صكره بر ادری (آلفونس سانشه) یی دخی نفی وطرد، واوغلنك خفیاً تزوج ایتمش اولدیغی (اینس) اسمنده بر قیزی قتل ایتمشیدی. قشتاله حكمدارلریله دخی بر چوق وقت محاربه ایتدكدن صكره، مغرب اهل اسلامنه قارشی بونلرله عقد اتفاقه مجبور اولمش ایدی. بشنجی آلفونس _ ((آفریقالی)) لقبیله ملقبدر. ١٤٣٨ دن ١٤٨١ ە قدر پورتكیز حكمداری اولوب، ٦ یاشنده ایكن تخته اوتورمش، وسن رشده واصل اولنجه، عمیجه سی و وصیسی اولان دون پدرویی كندی الیله اولدیردكدن صكره، آفریقایه چكوب، اهل اسلامله متعصبانه حرب ایده رك، طنجه وساىٔر بعض قصبه لری ضبط ایتمش؛ وقشتاله حكمدارلری فردیناند وایزابلا ایله دخی خیلی اوغراشمشدر. بونك زماننده پورتكیزلیلر آفریقای غربی سواحلندن كینه یی كشف ایتمشلردر. آلتنجی آلفونس _ دردنجی ژانك اوغلی ووارثی اولوب، پدرینك وفاتنده ١٦٥٦ تاریخنده، ١٣ یاشنده اولدیغی حالده، والده سنك وصیلكیله تخته چیقمش ایسه ده، سفاهتی حسبیله، ١٦٦٧ ده حكومتدن اسقطا اولنه رق، بر ادری دون پدرو وكیل تعیین اولنمشدر.