Africai Osmani - آفريقاي عثماني

دولت علیۀ عثمانیه نك آفریقا قطعه سنده كی ممالكندن عبارت اولوب، وقتیله سویشدن مغرب اقصا یعنی فاس حدودینه قدر ممتد اولمغله، همان كافۀ سواحل شمالیه سنی وصحرای كبیره قدر شمال قسمنی حاوی ایدی. او وقت مصر طوغریدن طوغری یه ادارهٔ عثمانیه آلتنده، وطرابلس ایله تونس وجزایر دخی بولنان بكلرك تحت اداره سنده بولنوردی. بعده مصره امتیاز ویرلمش؛ بالعكس طرابلس غرب بنغازی وفزانله برابر دولت عثمانیه نك طوغریدن طوغری یه اداره سی آلتنه كیرمش؛ وتونس جزایری بر وسیله ایله فرانسه استیلا ایتمش؛ وتونس اسكی حالنده قالمشیكن، بوصوك سنه لرده فرانسه جمهوریتی اوراسنی دخی تحت حمایه سنه آلمق ادعاسیله تسلطنی اورایه قدر توسیع ایتمشدر. مع هذاتونس ممالك عثمانیه دن معدود اولوب، آفریقای عثمانی یه داخل بولندیغی كبی، دولت علیه جزایرده كی حقوقندن دخی واز چكمه مش، وفرانسه نك بو قطعه ده حقوق حاكمیتنی طانیمامشدر. بویله برحال تذبذبه دوشن بو ایكی قطعه یه بدل حكومت خدیویه-

نك همتیله ممالك مصریۀ عثمانیه وادیٔ نیل بوینجه بو نهرك منبعلرینه وسودانك مركزینه قدر، و بحر احمر بوینجه دخی عدن كورفزینك آلتنه قدر توسیع اولنمش ایسه ده، بو صوك سنه لرده سودانده ظهور ایدن حال اغتشاش اوزرینه، اورالری مصرك اداره سندن‌ چیقمش كبیدر، وبحر احمرك بعض سواحلنه فرانسزلر وایتالیانلر مسلط اولمشلردر. هر حالده، الیوم آفریقای عثمانی بری طوغریدن طوغری یه ادارۀ عثمانیه ده بولنان وبری ده امتیازله دولت مشارالیهایه تابع اولان ایكن قسمدن مركب اولوب، طوغریدن طوغری یه دولت عثمانیه یه تابع اولان قسمی فزان خطه سنی دخی جامع اولان بنغازی مستقل سنجاغیدر. ممالك ممتازه دخی مصر وتونسدن عبارتدر. بو مملكتلرك هر بری حقنده اسمی صره سنده معلومات مفصله ویریله جكندن، شوراجقده بو قطعه نك بر طرفی بحر سفید سواحلی بوینجه اوزانه رق، اوروپانك تا قارشیسنده، بر طرفی بحر احمره ناظر اولوب، آسیا وآفریقانك بحر محیط هندیده كی سواحلیله اختلاط تجاریده، اوبر طرفلری دخی نیل مجراسی وایشلك كاروان جاده لری واسطه سیله آفریقای وسطی وسودانله‌ ارتباط تامده بولنمغله، تجارت وسیاست نقطۀ نظرندن پك بیوك اهمیتی اولدیغنی، وبتون آفریقانك بر سدسی راده سنده بر قطعۀ واسعه اولوب، همان كاملاً عرب امت نجیبه سیله واهالیٔ اسلامیه ایله مسكون بولندیغنی ذكر ایتمكله اكتفا ایدرز.