Arnold - آرنولد

آمریقاده كی ممالك مجتمعه جزاللرندن اولوب، ممالك مذكوره نك استقلالنی منتج اولان محارباتده ابراز شجاعت ایتمسی اوزرینه، فیلادلفیا قوماندانلغنه تعیین اولنمش؛ ومؤخراً نویورق قربنده كی (وست پوآنت) موقع مهمنك مدافعه سنه مأمور ایكن، مستحق اولدیغی بر جزادن طولایی دلكیر اوله رق، ١٧٨۰ تاریخ میلادیسنده، موقعی انكلیزلره تسلیم ایتمك اوزره ایكن، خبر آلنه رق، دشمن طرفنه فراد والتجایه مجبور اولمش؛ وانكلیزلرله برابر وطنی علیهنه استعمال سلاح ایتمشدر.