Ahmed Bin Hanbel - احمد بن حنبل

(امام ابو عبدالله _ بن محمد شیبانی) اصحاب مذهب اولان اىٔمۀ اربعه نك بری اولوب، پدری مرولی اولدیغی حالده، والده سی حامل اوله رق، بغداده كلمش، و كندیسی ١٦٤ تاریخنده بغدادده طوغمشدر. مروده طوغوب، ممه ده ایكن كلمش اولدیغی دخی مرویدر. تحصیل علم و كمال ایتدكدن صكره، مكه، مدینه، شام، یمن، بصره، كوفه، جزیره وساىٔر طرفلره سیاحتله، زماننك مشاهیر رواة و محدثینندن استماع احادیث شریفه ایتمش؛ و كندیسندن مسلم، بخاری، بغوی و ابن ابی الدنیا كبی مشاهیر روایت ایتمشلردر. مناقبنه داىٔر پك چوق كتابلر یازیلوب، بیهقی و ابن جوزی امام احمد بن حنبلك ترجمۀ حالنه داىٔر برر بیوك جلد یازمشلردر. امام شافعینك اصحابندن وتلامذه سندن اولوب، حدیث و فقهده زماننك فریدی ایدی. امام ابو یوسفك ارتحالندن و امام شافعینك مصره انتقالندن صكره بغدادده صاحب ترجمه دن بیوك فقیه و محدث قالمامشیدی. علم حدیثده ((المسند)) عنوانیله بر كتاب یازمشدر، كه او وقته قدر یازیلان كتب حدیثك اكبر و اكملیدر، خلق قرآنه قاىٔل اولمق اوزره دعوت

اولنه رق، امتناعده اصرار ایتدیكیچون، ٢٢۰ تاریخنده ضرب و حبس اولنمشیدی. ٢٤١ تاریخنده بغدادده وفات ایدوب، جنازه سنده سكسان بیك اركك و آلتمش بیك قادین بولندیغی مرویدر. ورع و تقواسی دخی علم و كمالیله متناسب ایدی. مذهب حنبلی بو ذاته منسوبدر.