Ahmed Gazi Sultan Han Salis - احمد غازی سلطان خان ثالث

(غازی سلطان _ خان ثالث) سلطان محمد خان رابعك اوغلی اولوب، سلاطین عظام عثمانیه نك یكرمی اوچنجیسیدر. ١۰٨٣ تاریخنده طوغوب، ١١١٥ سنه سنده، برادری سلطان مصطفی خان ثانیدن صكره، جلوس ایتمش؛ و ٢٨ سه سلطنت سوردكدن صكره، ١١٤٣ ده فراغ، و ١١٤٩ ده ٦٦ یاشنده ارتحال ایتمشدر. جلوسنی متعاقب سلفنك فراغنی موجب اولان عصیان اربابنه مماشات ایتمش ایسه ده، بعده بونلری بحق تربیه، و بونلرك تكلیفی اوزرینه نصب ایدلمش اولان صدراعظم و ساىٔره یی عزل و نفی ایتمشدر. زمان سلطنتنك اك مهم وقوعاتی اسوج قرالی اون ایكنجی شارلك، روسیه یه مغلوب اولمسی اوزرینه، دولت علیه یه التجا ایتمسی ب بونك سببیله روسیه ایله اولنان محاربه در. بو محاربه ده عساكر عثمانیه (پروت) نهری اطرافنده روس عسكرینی كلیاً منهزم ایدوب، بیوك پترویی اسیر طوتمق اوزره ایكن، زوجه سی قترینه نك دسایسیله قوماندان بولنان بالطه جی محمد پاشا جزىٔی بعض منافعله آلدانه رق، صلحی قبول ایتمش، و اله كچمش اولان اویله بر فرصتی قاچیرمشدر. بعده اون ایكنیی شارلك ممالك عثمانیه دن اخراجی دخی بر مسىٔله اولوب، كوج حال ایله كیتمكه ارضا اولنمشیدی. و ندیكلیلرله و قوع

بولان محاربه دخی غالبیت عثمانلیلر طرفندن قالوب، موره استرداد اولنمش ایسه ده، نمچه ابله اولان محارباتده مو فقیت حاصل اوله مامش؛ و نهایت بو ایكی دولتله بردن معاهده عقد اولنمشدر. ایران حدودنده دخی عساكر عثمانیه بر چوق مظفریاته ناىٔلالوب، تفلیس، نحچوان، تبریز، همدان، نهاوند، اردبیل و ساىٔر نیچه بلاد اولنمش ایسه ده، مؤخراً ایرانیلر بلاد مذكوره یی استرداد ایتمشلردر. هر حالده پادشاه مشارالیهك اواىٔل سلطنتی موفقتی و مظهریتله كچمش ایسه ده، بعده امور دولتك عنانی صدراعظم بولنان داماد ابراهیم پاشانك یدینه براقیلوب، ابراهیم پاشا ایسه ذوق و اكلنجه یه مجبور اولمغله، اولیای امور بسبتون ذوق و سفاهته طالمش اولدقلرندن، اولكی مو فقیاته بدل هر طرفدن آثار نكبت رونما اولمغله، نهایت ١١٤٣ تاریخنده وقوعه كلن یكچریلرك غلو وعصیانی اوزرینه، فراغه مجبور اولوب، برادرزاده سی سلطان محمود اول جلوس ایتمشدر. سلطان احمد ثالث باغچه قپوسنده والده سلطان تربه سنده مدفوندر.