Ahmed Sultan Han Sani - احمد سلطان خان ثانی

(سلطان _ خان ثانی) سلطان ابراهیم خانك اوغلی و سلطان احمد خان اولك تورونی اولوب، سلاطین عظام عثمانیه نك یكرمی برنجیسیدر. ١۰٥٢ تاریخنده طوغوب، ١١۰٢ تاریخنده ٥۰ یاشنده اولدیغی حالده، برادری سلطان سلیمان ثانینك وفاتی اوزرینه جلوس، و درت سنه سلطنت سوردكدن صكره، ١١۰٦ سنه سنده وفات ایتمشدر. صلحپرور بر پادشاه ایدیسه ده، تیز مزاج و سریع الغضب ایدی. صید و موسیقی یه ماىٔل و حسن خطه مالك ایدی. جلوسلری سنه سی صدر اعظم بولنان كوپریلی مصطفی پاشا نمچه محاربه سنه كیتمش؛ و هر نه قدر كه بحراً دولت عثمانیه دوننماسی غالب كلمش ایسه ده، براً موفقیت حاصل اوله میوب، مصطفی پاشا دخی محاربه ده قتل اولنمش؛ و بر خیلی مدت دولت مشار الیها ایله مخاصمات قپوسی آچیق قالدقدن سكره، ١١۰٤ سنه سنده انكلتره و فلمنكك توسطیله مصالحه عقد اولنمشدر. قانونی سلطان سلیمان تربه سنده مدفوندر.