İbrahim Bin Mes'ud - ابراهیم بن مسعود

ظهیر الدوله، ملوك غزنویه نك طقوزنجیسی اولوب، اوچنجی پادشاه اولان سلطان مسعودك اوغلی و دولت مذكوره نك مؤسسی اولان سلطان محمود بن سبكتكینك تورونیدر. ٤٥۰ تاریخنده، برادری فرخزادك وفاتی اوزرینه، جلوس ایدوب، برادری زماننده سلچوقیلرله محاربه آچلمش ایكن، سلطان ابراهیم بونلرله صلح ایده رك، و حتی ملكشاه سلچوقینك قیزینی كندی اوغلی مسعوده آله رق، او طرفدن كسب امنیت ایتدكدن صكره، هندستانه سوق عسكرله، بیوك پدری سلطان محمودك ضبط ایده مه مش اولدیغی نیجه قلاع و ممالكی ضبط، و اهالیسنی دین اسلامه دعوت ایله، هندستانده انوار اسلامیه نك نشر و تعمنه پك بیوك خدمتلر ایتمشدر. بر روایته كوره ٤٨١ و دیكر بر روایته كوره ٤٩٢ تاریخنده وفات ایدوب، ٣١ ویا ٤٢ سنه سلطنت سورمشدر. غایت متدین و متقی وعادل و صالح بر پادشاه ایدی. اوچ آیلرده متمادیاً اوروج طوتار، و حسن خطی دخی اولمغله، هرسنه بر مصحف شریف یازه رق، بر سنه مكۀ مكرمه و بر سنه مدینۀ منوره یه كوندرردی. بو مصاحف شریفه دن بر قاچی الآن حرمینده موجود اولدیغی مرویدر. ٣٦۰ اركك و ٤۰ قیز كه جمعاً ٧٦ اولادی اولوب، قیزلرینی حیاتنده سادات كرام و علمایه تزویج ایتمشیدی. امام یوسف سجاوندی ایله شاعر ابو الفرج معاصرلری اولوب، ایكیسنه دخی توجه و محبتی وار ایدی.