İbrahim Bin Tıbah - ابراهیم بن طباخ

شامك اوننجی عصر هجری علماسندن اولوب، پدری عن اصل خلیل بلده سندن اولدیغی حالده، كندیسی دمشقده طوغمش؛ و اوراده اكمال تحصیل ایتدكدن صكره، قاضی القضاة سید محمد بن معلولك نزدینه ملازمتله، بعض نیابتلره تعیین اولنمش؛ و بعده درسعادته كله رك، و ظیفه یه ناىٔل اولدقدن صكره، ٩٩٤ تاریخنده دمشقه عودتله، صالحیه ده كی سلیمیه مدرسه سنده تدریس علومه باشلامش؛ و سنان پاشانك زماننده و ظیفه و اعتباری تزیید اولنمشیدی. ارباب ورع و تقوادن اولوب، جامع امیه یه دوام ایدر، و علمای معاصرینله مباحثه و جدلدن خالی قالمیوب، قاضی محب الدین و احمد غیثاوی ایله مناظره یولنده برر رسالۀ ردیه یازمشلردر. ١۰۰٦ سنه سی شعباننده ارتحال ایدوب، و صیتی اوزره مقابر صوفیه ده دفن اولنمشدر.